Darréu cellebro’l so V Conceyu Nacional

Na mañana del sábadu 20 d’avientu la Mocedá d’Izquierda Soberanista desendolcó’l so V Conceyu Nacional, órganu congresual que sirvió p’afondar na posición ideolóxica, organizativa, política y estratéxico-táutica de la organización,aldericando alrodiu distintes cuestiones que van sirvir p’avanzar na construcción d’un referente  políticu y social pa la mocedá asturiano.

Asina, aldericóse alrodiu un documentu políticu nel que s’analiza la situación d’Asturies dende’l puntu de la vista de la mocedá, poniendo tamién el puntu mira na actual situación de la izquierda soberanista asturiana, y nel camín que Darréu quier siguir d’equí p’alantre na xera d’organizar y concienciar a la xente mozo del nuesu país. Tamién hebo espaciu pa propuestes de remocique nos estatutos, asina como otres cuestiones empobinaes a un meyor furrulamientu y organización a nivel internu.

No tocante a les decisiones más destacaes, la militancia de Darréu decidió frayar los venceyos formales con Andecha Astur, entendiendo que nel actual contestu les contradicciones esistentes ente dambes organizaciones yeren inasumibles por más tiempu. Nesi sen, la Mocedá d’Izquierda Soberanista apuesta por asitiase como la organización xuvenil de la izquierda soberanista asturiana, entendiendo’l futuru d’ ésta como un movimientu compuestu por distintes estayes que tán construyéndose dende yá.

Nestes y otres cuestiones afóndase nel documentu aprobáu, que va asoleyase públicamente nos próximos díes.