1º Mayu: la mocedá asturiano en llucha por un #CamínSocialista

La Mocedá d’Izquierda Soberanista quier, coincidiendo col Día Internacional de la Clase Obrera, siguir denunciando la situación socioeconómica y política que ta viviendo’l nuesu país y el conxuntu de pueblos somorguiaos col capitalismu mundial.

Pesie a la propaganda gubernamental y de los medios de comunicacón-empresa qu’intenten vender una recuperación económica, la realidá pa la clase obrera asturiano nel so conxuntu diz lo contrario: un desemplegu que malapenes evoluciona positivamente, y de facelo ye principalmente pola perda de población activo. La tasa d’actividá d’Asturies ye la más baxa del Estáu español, con unos niveles de precariedá y temporalidá que nun dexen de medrar.

Y si esto ye a nivel xeneral, la mocedá sufre con mayor intensidá entá esta situación no llaboral, con miles de mozos y moces nel paru ensin atopar un primer emplegu, que d’alcontralu carauterízase pola precariedá, esplotación y temporalidá. L’únicu camín que mos dexen nesta materia: la emigración a la gueta d’un trabayu dignu, que non siempres s’algama igualmente.

Nun ye meyor la situación n’otros drechos sociales, con un espoxigue de la represión empobinada por normatives como la “Ley Mordaza”, la persecución a les lluches populares, la perda de calidá nun sistema educativu que pierde profesoráu y condiciones llaborales del mesmu, que dificulta cada vegada más l’accesu a enseñances superiores, qu’espulsa a alumnáu de la universidá, qu’empiora les condiciones materiales nel enseñu…

Llevamos décades asistiendo al desmantelamiento de los principales seutores económicos del país, con especial gravedá nuna industria afeutada por esa gran mentira d’una “reconversión” que nun ye más que desindustrialización. Retayen drechos, piesllen industries, y reprímenmos si protestamos por ello, mientres les élites polítiques y económiques nun paren d’aumentar los sos alloriantes beneficios económicos.

La ofensiva del capital namái la vamos poder aparar con organización y movilización popular, cuntando la mocedá con un papel perimportante en too ello: les lluches estudiantiles, les reivindicaciones nes cais escontra la emigración, la precariedá, o contra la negación de les señes culturales propies del nuesu pueblu, son perimportantes como dinamizadores d’una sociedá na qu’hai que frayar col inmovilismu.

Poro, reivindicamos dende Darréu l'autorganización del Pueblu Trabayador Asturianu de cara a conquistar tolos sos drechos sociales. Una llucha en defensa de los sos intereses coleutivos de clas cuyos pegoyos tienen de ser el socialismu, la llucha antipatriarcal, la defensa de los drechos nacionales d’Asturies, y la solidaridá ente pueblos.

La soberanía p'Asturies ye vital pa poder salir de les cadarmes orgániques y estructurales capitalistes y avanzar nel camín del socialismu, haza una República Socialista Asturiana cola que construyir Poder Popular y avanzar escontra toles esplotaciones, dominaciones y opresiones esistentes.

¡PUXA’L PRIMERU DE MAYU!

¡PUXA LA LLUCHA DE LA CLASE OBRERA!

¡PUXA ASTURIES LLIBRE Y SOCIALISTA!