Darréu énte la muerte de seis mineros en La Pola de Gordón.

La Organización de la Mocedá d'Izquierda Soberanista - Darréu - quier tresmitir la so solidaridá a les families de los seis mineros muertos nel día de güei nel Pozu Emilio, en la Llomberu, nel Conceyu de La Pola de Gordón. Tamién queremos tresmitir el nuesu sofitu a los cinco trabayadores firíos ya intoxicaos, ún d'ellos con muncha gravedá. Dende la mocedá asturiano consciente unviamos un fuerte abrazu solidariu a tola vecindá de La Pola de Gordón.


Llamentamos les pérdines humanes por mor d'un escape de gas na mina de la Hullera Vasco-Leonesa y pidimos que s'anicie una fonda investigación sobre l'accidente y asina depurar responsabilidaes si tamos énte un casu de inseguridá nel tayu. Sofitamos el paru de 48 hores convocáu na minería y nun podemos escaecer que los trabayadores d'esti pozu señalen que se daben les condiciones de seguridá afayaices. Esto nun ye d'estrañar, pues toles midíes empobinaes pola oligarquía española y europea van nel sen de que los trabayadores pierdan drechos y condiciones llaborales dignes.

Asina tamién, critamos l'actitú del Ministru d'Industria, Soria, que vien agora a faer la semeya colos mineros y solidarizase coles víctimes pero que gracies al so plan de la minería ñega da-y al seutor una viabilidá digna, retayando hasta la fin de l'actividá. Tamién foi esti ministru'l que prindó a cientos de mineros en llucha y criminalizó les protestes de los mesmos, reprimiendo, en collaboración con Gabino de Lorenzo, la llucha minera.

¡SOLIDARIDÁ, ÁNIMU Y ORGUYU MINERU DE CLAS!