jueves, 27 de marzo de 2014

Participamos na movilización en sofitu a la minería

Darréu, la Mocedá d’Izquierda Soberanista participó na tardi del 27 de marzu na movilización convocada por CCOO y el SOMA contra los despíos n’HUNOSA y pola viabilidá del seutor mineru que percorrió les cais de Sama y Ciañu y finó énte’l Pozu Maria Luisa. Militantes de Darréu quinximos formar parte de la manifestación pesie a les discrepancies colos convocantes nel marcu teórico y praútico, entendiendo que perriba de too ta la defensa de los trabayadores de la minería y que les cuenques mineres tengan un futuru dignu.

Na manifestación portamos banderes del país, banderes socialistes y banderes de la nuesa organización y quinximos afitar la nuesa postura crítica espardiendo ente cientos de persones un pasquín informativu. Nel posicionamientu, qu’alxuntamos abaxu, apostamos pola nacionalización del carbón, la soberanía política y económica’l país y la braera unidá obrera, superando los marcos sindicales tradicionales, mui institucionalizaos anguaño.

Delles decenes de miles de persones salieron a les cais del Conceyu de Llangréu a manifestase pol futuru del seutor. Quedó nidio que la xente quier movilización y llucha pola minería y l’escenariu abiertu, con un Gobiernu d’España enfotáu en desmantelar el seutor y un gobiernu autonómicu cómpliz y sucursalista, faen que la llucha obrera y popular seya l’únicu camin. Dende Darréu glayamos al altu la lleva que la mina nun se cierra y ye’l momentu d’Asturies y la tresformación social afitada n’un procesu de reconstrucción nacional.



TESTU ESPARDÍU:

¡CON SOBERANÍA LA MINA TIEN FUTURU!

Dende Darréu, la Mocedá d'Izquierda Soberanista queremos tresmitir la nuesa posición sobre la situación pergrave que ta viviendo'l seutor mineru:

  • Consideramos que'l momentu presente n'Asturies llama a la unidá obrera y popular polo qu'entendemos que ye necesariu superar los marcos de les cúpules de los sindicatos institucionales (SOMA y CCOO) y puxar poles Asamblees de Trabayadores. La movilización de la cabera selmana en Xixón entamada por estes asamblees foi un exemplu d'autoorganización obrera democrática.
  • Los recortes del Gobiernu d'España tan matando les cuenques mineres y el futuru de la minería. Nesti sen, queremos solliñar el papel activu a la hora de desmantelar la minería que ta exerciendo'l PP y el papel activu qu'exerció'l PSOE asturianu y español nos años 90. La mocedá asturiano ye quien más sufre y va sufrir estes agresiones y traiciones nel futuru.
  • Creemos que namái la tresformación de la sociedá puede cambiar la situación llaceriosa que viven les cuenques y la mina. Creemos qu'algamando poder popular y una Asturies más soberana, onde'l so pueblu tome toles decisiones y nun vengan imposiciones de la Europa del capital o d'España. La nacionalización del carbón ye'l futuru del seutor y namái podremos facer realidá esto con soberanía política y económica p'Asturies. Tamién queremos dexar bien claro que nun queremos nin un solu cielu abiertu.

¡Con llucha obrera y popular hai futuru! ¡Nacionalización del carbón!
¡Puxa Asturies dixebra y socialista!

No hay comentarios:

Publicar un comentario