miércoles, 24 de octubre de 2018

Crónica del DMR 2018


La fin de selmana del Día de la Mocedá Revolucionario 2018 entamaba cola concentración de protesta escontra los Premios Princesa, na que participamos dientro del bloque #LluchandoPolaSoberanía pa dexar bien claro que la mocedá asturiano nun tien rei, nin princeses, nin "Principado".



La xornada del sábadu entamaba col Alcuentru Internacionalista, cola presencia de delegaciones de Ruchar dende'l País Llionés y Arran dende Païssos Catalans, pa sentir ya intercambiar paeceres con Aby Athman, presidente de Cosara, alrodiu l'Autodeterminación del Pueblu Saharaui, qu'entá carez les consecuencies d'un conflictu colonial ensin iguar.




Tres la xinta, turnu pa la charra con Oskar Matute alrodiu "Repúbliques y procesos constituyentes, baltiando'l réxime del 78", na que'l diputáu d'EH Bildu nel Congresu espuso una visión soberanista y centrada nes clases populares y les sos reivindicaciones, que pasen necesariamente por frayar dende y pa los pueblos esti réxime que mos somorguia.

Pa rematar, los conciertos de Brutus Daughters, La Tarrancha y Fruela 757 nel XV Asturies Nun Escaez, nel que, como ye vezu, hebo espaciu pa un pequeñu actu políticu nel que tuvieron presentes los valores de la nuesa organización. Dende Darréu damos les gracies a toles ponentes, asistentes, a los grupos musicales, y a toa aquella xente que fizo posible un añu más el DMR. ¡Puxa la llucha de la mocedá!



lunes, 8 de octubre de 2018

Día de la Mocedá Revolucionario 2018



Asoleyamos el cartelu coles actividaes que van componer el Día de la Mocedá Revolucionario 2018, qu'esti añu tarán concentraes el sábadu 20 d'ochobre. Sicasí, el día enantes, vienres 19, hai una cita imprescindible na plaza La Escandalera, onde un añu más ta convocada la concentración escontra los Premios Princesa. Ellí taremos participando nel bloque #LluchandoPolaSoberanía pa volver a glayar bien alto qu'Asturies Nun Tien Rei, que la mocedá asturiano ta farta d'imposiciones y de corrupción.

El sábadu 20 entamaremos la xornada dende les 12:00 nel Llar La Llegra col Alcuentru Internacionalista, onde les organizaciones xuveniles desplazaes a Asturies van aldericar y esponer delles cuestiones sobre la realidá de los sos países -que diremos detallando-, poniéndoles en comuña pa deprender y avanzar. Depués d'ello, haza les 14:00, sedrá hora de reponer fuercies con una Xinta Popular (5 euros). 

Nel propiu llar, dende les 17:00, vamos cuntar con Oskar Matute (Diputáu d'EH Bildu nel Congresu), pa siguir afondando na reflexón y l'alderique, nesti casu alrodiu "Repúbliques y procesos constituyentes, baltiando'l réxime del 78". Yá pa rematar la xornada y el DMR 2018, el XV Asturies Nun Escaez na Sala Sir Laurens, de magar les 20:00.

miércoles, 26 de septiembre de 2018

XV ASTURIES NUN ESCAEZ




Un añu más torna’l Día de la Mocedá Revolucionario, un espaciu mozu nel que siempres tien cabida l’alcordanza de la revolución asturiana d’ochobre’l 34, pero tamién tán mui presentes les reivindicaciones de la mocedá asturiano p’anguaño y pal futuru, con actividaes p’aldericar, reflexonar, folixar…
 
La primer actividá qu’anunciamos pal día 20 d’Ochobre ye otru clásicu: el festival musical Asturies Nun Escaez, que nesta XV edición va cuntar con 3 propuestes na uvieína Sala Sir Laurens. La primera d’ella van ser los madrilanos Brutus Daughters, que vuelven a Asturies pa facenos esfrutar col so soníu punk folk cargáu de reivindicación. Tamién va haber espaciu pa ún de los grupos referentes de la escena n’asturianu, La Tarrancha, qu’a piques d’asoleyar un nueu discu van facenos baillar cola so mecigaya musical, tamién enllena de compromisu nel so mensaxe. Pa rematar esta edición, Fruela 757 va tar presente con un bon garrapiellu de mezcles qu’axunten la música lletrónica cola tradición sonora del país. 

 
Les entraes van tar próximamente a la venta a un preciu de 5 euros n’anticipao (8 euros en taquilla), nos siguientes puntos de venta:
-L’ENTREGU: CS La Semiente
-LA FELGUERA: Matteria
-UVIÉU: La Luna, L’Esperteyu
-MIERES: L’Abellugu
-LA POLA SIERO: Diañu
-XIXÓN: Sidrería Canteli
-L’INFIESTU: La Traviesa
-ONLINE: http://entradium.com/entradas/xv-asturies-nun-escaez


¡A nun tardar, más novedaes!

Xornada de la mocedá asturiano y llionés



Xornada entamada a comuña cola organización de mocedá Ruchar, na que s'inclúi la xubida al Picu Fontañán, con visita a les trincheres de les resistencies antifacistes, asina como xinta y alderique pa siguir afondando nos llazos pente la mocedá de dambos pueblos.

Homenaxe Mártires de Carbayín



Homenaxe a los 24 homes que fueron asesinaos en venganza a los guardias civiles muertos en Sama na ofensiva que los trabayaores de la cuenca del Nalón llevaron a cabu nos primeros díes de la revolución.

Sacaos de la cárcel de Ciañu, la nueche del 24 d'ochobre Benjamín García, Agustín Amil, Melquíades Álvarez, José Meana, Laurentino Meana, Eloy Vallina, Honorio Vallina, Faustino Freigedo, Gumersindo Díaz, Tomás Centeno, Manuel Fernández, José María Vega, Cándido Díaz, Alejándro García, Ángel Vallina, Celso Rodríguez, Ernesto Pérez, Alejandro González, Dimas Yáñez, Antero Valdés, Gerardo Noriega, Antonio Flórez, Ernesto Vázquez, José Montes y Laudelino García fueron executaos en mitá de la nueche. Los nomes d'estos homes son, de la mesma mena, los nomes de tantos homes y muyeres qu'entregaron la so vida nes sos aspiraciones revolucionaries.


Los fechos d'ochobre de 1934 supunxeron un antes y un dempués na llucha de la clas obrera escontra'l facismu. El proletariau asturianu nun quiso esperar a que los facistes entraren a formar parte nel gobiernu republicanu y decidieron llantá-y cara dende'l primer minutu. La revolución ye una cuestión de voluntá y autodeterminación: voluntá de xunidá, d'enfrentase al enemigu común y autodeterminación pa llegar hasta'l final na llucha emancipadora de la clas trabayaora.


Dende Nora Antifa, Darréu y Pueblos Contra el Fascismo queremos facer llamamientu de xunidá, la mesma xunidá que llevó a la clas obrera asturiana a intentar facer realidá les sos aspiraciones revolucionaries y llantá-y cara al facismu.


¡¡PUXA L'ALIANZA DE LA CLAS OBRERA!!
¡¡PUXA ASTURIES LLIBRE!!
¡¡U.H.P!!

lunes, 30 de abril de 2018

¡Mocedá, fraya la precariedá!



Llega’l 1 de Mayu y toca facer alcordanza de les lluches pasaes, reivindicar esos episodios que ficieron avanzar a la nuesa clas énte la esplotación y les opresiones del capitalismu. Nun ye un día de cellebración, pero sí d’arguyu coleutivu como pueblu trabayador y, sobre too, de llucha.

La mocedá asturiano nun tuviemos novedaes positives: siguimos careciendo’l paru, la precariedá, la emigración, la falta d’accesu a vivienda digno, la fienda salarial pa les muyeres, y en definitiva a la posibilidá d’emancipanos nunes condiciones afayaíces y poder vivir y desarrollanos nel nuesu país.

Sicasí, como siempres, la rempuesta nun ta nel llamentu, nin nel conformismu, nin en cruzase de brazos: toca salir a la cai, siguir saliendo a la cai, pa glayar bien alto que la mocedá asturiano nun vamos parar fasta dá-y la vuelta a la tortiella de la miseria a la que mos quieren condergar. Pa reivindicar una Asturies soberana y socialista, como camín pa construyir el futuru qu’anguaño nun tenemos.

Con too ello, vamos tar presentes y llamamos a participar na manifestación entamada pol sindicalismu de clas (CSI, CGT, SUATEA, CNT XIXÓN) con entamu na Casa Sindical de Xixón a les 12:30 hores, na que va tar presente’l bloque #LluchandoPolaSoberanía, del que vamos formar parte una vegada más: precisamos de l’autoorganización, de la llucha, de tresformar la realidá del nuesu país. Frayar la precariedá y abrir un camín nuevu pa la nuestra clase y pal nuestru pueblu.


miércoles, 18 de abril de 2018

La mocedá pola oficialidá, ¡agora!


Esti 21 d’abril toca volver a les cais a denunciar la situación carecía poles llingües propies d’Asturies y les sos comunidaes de falantes. L’asturianu y gallego-asturiano siguen ensin vese llegalmente reconocíes n’igualdá de condiciones col castellán, esto ye: ensin oficialidá, situación qu’espeya la situación predemocrática na qu’entá s’alcuentra’l nuesu país.

La reivindicación ye bien clara y hestórica: la oficialidá de les nueses llingües propies, y el so consiguiente ya imprescindible procesu de normalización, siendo la mocedá un elementu perimportante, al ser el suxetu de tresmisión. Pa nós ye clave’l papel que tien que xugar la mocedá nesta llucha, como nel restu de les que desendolquen n’Asturies. Les nueves xeneraciones tenemos qu'algamar una Asturies más llibre, xusta y digna y pa qu'eso seya posible tenemos que superar un conflictu llingüísticu, que ye parte del conflictu nacional y social que fae d’Asturies el país decadente que güei sufrimos como moces y mozos. 

Como señalábemos nel Día de la Llingua Materna, no tocante a les instituciones y la representación política conceyil y na Xunta Xeneral, la confianza tien de ser llimitada, siendo imprescindible’l caltenimientu y meyora d’un movimientu popular que puxe y presione pa que, amás de nun dar pasos atrás se dean pasos alantre. Amás, nun hai meyor defensa escontra los ataques continuaos dende’l tarrén mediáticu, patronal, etc, qu’un bon ataque basáu n’esparder énte’l pueblu asturianu la importancia d’esta llucha, de concienciar escontra los prexuicios y mentires espardíos dende’l poder. De recuperar el nuesu arguyu y la nuesa identidá, énte la que s’atopen les llingües de les clases populares del nuesu país: l’asturianu y el gallego-asturiano.

Poro, la llucha ta na cai. Esta reivindicación, como’l restu, vamos algamales cola organización y la movilización. Ye por ello que llamamos a participar esti 21 d’abril a les 12:00 n’Uviéu dientro’l bloque ‪#‎LluchandoPolaSoberanía‬, al entender qu’esta llucha ye una de les munches que tenemos que siguir desendolcando p’algamar una Asturies llibre d'opresiones.