Esti vienres 9 de Mayu, a les 19.30 na estación
de RENFE d'Uviéu, tendrá llugar la yá rutinaria manifestación pola oficialidá
de la llingua asturiana, entamada pola XDLA. Dende Darréu, un añu más y non por
ello con menos fuercia, llamamos al pueblu asturianu a salir a la cai pa
lluchar polos nuesos drechos llingüísticos. De la mesma manera, llamamos a la
xente a participar nel bloque soberanista, yá presente
na manifestación del 1 Mayu en Xixón, entendiendo ésta como la meyor manera de
defender los drechos de los asturianos: xunitariamente.
Un añu más, los asturfalantes vémonos sometíos al
centralismu políticu del Estáu español qu'ente otres coses, ataca
imparablemente a la nuesa llingua, queriendo imponenos una uniformación
llingüística antidemocrática y aculturizaora. De la mesma manera, el conxuntu
de los partíos que tienen representación na Xunta Xeneral, sigue dando-y la
espalda a esti drechu básicu. La nuesa llingua vese día a día vetada nos medios
de comunicación, na alministración ya inclusu na enseñanza, onde la represión
llingüística y el menospreciu escontra l'asturianu van n'aumentu.
Dende Darréu, la mocedá d'izquierda soberanista,
esiximos la oficialidá del asturianu y'l consiguiente procesu de normalización
llingüística nel nuesu país. Pa ello, llamamos al pueblu asturianu a movilizase
non sólo pola nuesa llingua, sinon por una Asturies xusta y llibre, que namái
algamaremos #LluchandoPolaSoberanía.
¡Non más represión llingüística! ¡L'asturianu
llingua oficial yá!
No hay comentarios:
Publicar un comentario