Nin Principado, nin España, nin Capitalismu: República Socialista Asturiana

La Mocedá d’Izquierda Soberanista quier pronunciase un añu más alrodiu d’esi humildante circu que dende va décades llega al nuesu país la selmana del caberu vienres d’Ochobre, col envís de desarrollar un eventu elitista destináu a llavar la cara d’una monarquía española n’hores baxes, y de siguir afitando n’Asturies los valores españolistes y reaccionarios carauterísticos de dicha institución.

Amás d’esti circu mediáticu, y del estáu policial nel que se convierte Uviéu mientres dura, dende Darréu señalamos la perimportante financiación con dineru públicu d’esti eventu nuna situación na que la mocedá asturiano s’alcuentra n’emerxencia social: cifres de paru descomanaes, niveles de precariedá y temporalidá hestóricos, dificultaes crecientes pa poder estudiar, y la emigración forciada como consecuencia de too ello.

Pero esto nun importa a unes élites polítiques, económiques y sociales del Estáu español qu’añu a añu aterricen n’Asturies, ayenos tanto a la situación social como a la propia identidá del nuesu país, intentando esparder tou tipu de valores contrarios a la igualdá, la democracia y el respetu a la diversidá cultural que defendemos dende Darréu.

La naturaleza opresora y antidemocrática del Estáu español, como ferramienta de les oligarquíes que ye, materialízase y tamién simbolízase perbién na nuesa nación asturiana con esa institución impuesta del “Principado”, aprobada como tola institución monárquica nun “referéndum” fechu so l’amenaza militar y con un 40% d’abstención n’Asturies. Dende entós enxamás se-y entrugó al nuesu pueblu, nin pa esi, nin pa nengún otru tema más allá de les eleiciones del sistema representativu burgués presentes nel nuesu probe –por nun dicir inesistente- autogobiernu, siendo evidente que la mocedá d’anguaño nun se siente identificao con esi tipu d’instituciones arcaiques.

Sicasí, dende la mocedá soberanista vamos más alló, y entendemos que’l cambiu necesariu nun ye camudar monarquía por república española, sinon acabar con toa forma d’opresión, seya de clase, nacional o de xéneru. Poro, el modelu pol qu’apostamos dende Darréu ye la República Socialista Asturiana, que fraye cola opresión  implícita nel proyeutu nacional español, coles esplotaciones a la clas trabayadora del sistema capitalista, y coles dominaciones propies del patriarcáu.

Porque la institución impuesta del “Principado”, símbolu de sumisión d’Asturies, nun representa a una mocedá asturiano que tien too por conquistar, llamamos dende Darréu a participar esti 24 d’ochobre, na concentración contra los Premios Príncipe a les 17:00 na Plaza La Escandalera, dientro’l bloque #LluchandoPolaSoberanía.

ASTURIES NUN S’HERIEDA

REPÚBLICA ASTURIANA, SOCIALISTA Y SOBERANA