martes, 2 de diciembre de 2014

La mocedá escontra'l pieslle d'Alcoa




La multinacional Alcoa vien d’anunciar despidos coleutivos na so planta d’Avilés, al nun consiguir nel procesu de subasta llétrica les tarifes que consideraben competitives. Nesi sen, amenacen col pieslle dela factoría si dende’l Ministeriu d’Industria nun s’ “igua” esta situación.

Tamos asistiendo polo tanto a un nuevu casu na crisis permanente de la economía asturiana, carauterizada por una fonda y constante desindustrialización que paez nun tener fin. Nesi sen, ye bien claru y llamativu’l papel del Estáu español y la Xunión Europea nesti casu: privaticen por un preciu casi regaláu pal seutor empresarial una compañía de titularidá estatal, que dende entós vien amenorgando producción y plantiya en varies fases. Y una vegada qu’esa multinacional considera que yá nun ye rentable siguir n’Asturies, plantega la so marcha. Otru casu más. Otru de tantos.

Na actual fase del sistema capitalista, l’Estáu español yá nun cunta col mesmu papel clave d’otres époques na centralización y concentración de capital, fechu qu’afeuta de mena frontal a una Asturies onde’l seutor públicu foi durante décades el sostén del texíu económicu. Y esto nun foi nin por caridá nin pol afán de les élites del Estáu español en dar a Asturies un texíu industrial, sinon pa la satisfacción de les sos necesidaes y maximización de beneficios mediante una distribución económica territorial del Estáu español na qu’Asturies cuntó con un papel clave en seutores como la estraición de minerales, o la producción de fierru y aceru. Una vegada más, Asturies, la so economía, y la so clas trabayadora, en manes d’un Estáu ferramienta del capital. 

Otru aspeutu a denunciar ye –l’avezáu- nulu y llamentable papel d’unes instituciones asturianes inoperantes y ataes de pies y manes por voluntá propia. De nueu, como coles privatizaciónes na siderurxa, la metalurxa, el naval… o’l desmantelamientu de la minería, Asturies depende dafechu de les decisiones vinientes de Madrí, del ministru d’industria de turnu. 

Esta cuestión amuesa una vegada más la necesidá imperante de soberanía, de que seya’l pueblu asturianu quien cunte coles ferramientes y la capacidá necesaria pa poder executar, equí y agora, les midíes que permitan la defensa de los sos intereses énte los del capital. Qu’una Asturies escedentaria na producción d’enerxía llétrica tea dependiendo de les llimosnes en forma de decisión viniente d’un gobiernu ayenu, espeya perbién la situación xeneral d’esti país: falta dafechu de soberanía, que dexa al pueblu trabayador asturianu vendíu a los porgüeyos esternos del capitalismu y les sos cadarmes, como España o la Xunión Europea.

Poro, dende la Mocedá d’Izquierda Soberanista queremos amosar el nuesu refugu al pieslle d’una industria de gran importancia na so zona, y ye que nesta Asturies de paru, precariedá y emigración, la xuventú nun puede permitir que nos roben nin un puestu de trabayu más. Nesi sen, consideramos imprescindible que les y los trabayadores faigan un apueste decidíu por formes de llucha que desborden los marcos de los sindicatos institucionalizaos SOMA-UGT y CCOO, col exemplu de les Asamblees de Trabayadores en Llucha como paradigma d’otra forma de facer sindicalismu y verdadera llucha obrera.

Namái’l camín d’un pueblu asturianu soberanu, encadarmáu al traviés d’una República Socialista Asturiana, va permitir acabar con tou esti mar de llaceries, despidos y esplotación.

ALCOA NUN PIESLLA

No hay comentarios:

Publicar un comentario