Darréu escontra los caberos episodios represivos

Decenes de persones foron deteníes el martes nel marcu de la "Operación Pandora", nome col que se mazcara una nueva aición represiva, nesti casu escontra'l movimientu llibertariu principalmente en Barcelona. Acúsase-yos de formar parte d'una organización terrorista responsable d'atentaos con esplosivos, fechos que, como ye bien evidente, cunten con poco no que sofitase, más allá de siguir criminalizando y reprimiendo a tou aquel movimientu que llucha.

Esti martes foi'l movimientu llibertariu en Barcelona, igual que díes atrás n'Euskal Herría'l pueblu desendolcaba aiciones escontra la detención de Jone Amezaga, condergada a añu y mediu de prisión por escolingar una pancarta. Otru casu más de la represión sistemática contra'l movimientu abertzale, continuada dende va munches décades y emplegando, en munchos casos, métodos represivos pioneros que, posteriormente, tan siendo treslladaos al conxuntu del Estáu español.

Y por si too esto fuera poco, el gobiernu central anecia en nueves midíes represives, como la perconocía "Ley Mordaza", que va endurecer les consecuencies de la llucha escontra esti sistema caducu y les inxusticies que xenera nel so día a día. Poro, dende la Mocedá d'Izquierda Soberanista queremos solidarizanos coles persones afeutaes, tanto n'otros países como nel nuesu propiu -multes descomanaes, peticiones de cárcel...-, por mor de la so necesaria llucha pa camudar les coses.

¡La solidaridá ye'l nuesu meyor arma!