Pola absolución de los procesaos de la minería

Les organizaciones xuveniles de los pueblos oprimíos pol Estáu español, pola absolución de los procesaos de la minería.

Recién vien de conocese la sentencia contra los cinco mineros de Zarréu, tres los fechos que tuvieron llugar nun accidente llaboral na “Mina de Cerredo” en 2012, nel que se vieron afectaos trés trabayadores.

L'actuación desdexosa ya irresponsable d'unu de los capataces de la empresa, nel orixe del accidente y la so actuación posterior, al marxe de los servicios médicos, punxo en peligru la vida d'estos trés trabayadores.

Esti proceder foi denunciáu por toles persones que lo presenciaron, polo que los compañeros de trabayu y los vecinos de la zona qu'allegaron al llugar del accidente, evitaron que'l capataz siguiera cola so irresponsable actitú, poniendo a salvu a los trés trabayadores afectaos y dexándolos en manes de los servicios d'ambulancia.

Sicasí, dende los xulgaos condérgase a los cinco afectaos a 12 años y mediu de cárcel, 2 y mediu caún, anque con posibilidá de recursu. Ye por ello qu'hai de siguir la movilización popular, tantu pa esixir l'absolución d'estes cinco persones, como'l restu del colectivu mineru que s'atopa en procesos xudiciales de resultes de les protestes esixendo un futuru pal so sector.

Mientres n’ Asturies desmantélense la minería y los demás sectores industriales, mientres se conderga a la clase trabayadora al paru y la miseria, mientres la impunidá protexe a quienes roben a manes enllenes los recursos que'l pueblu precisa pa sobrevivir, les cárceles vacíense de corruptos y enllénense con quienes defenden y lluchen polos nuesos derechos más básicos.

Ye por ello que dende les organizaciones xuveniles de los pueblos oprimíos pol Estáu español, queremos amosar la nuesa solidaridá de clase colos afectaos, esixendo la so total absolución de les acusaciones y penes que se-yos quieren aplicar. L'internacionalismu ye nuesa meyor arma pa siguir avanzando haza la emancipación de clase, nacional y de xéneru, de les nueses respectives naciones, asina como pa combatir la medría represiva que sigue'l so cursu nel Estáu español.

LLIBERTÁ 5 DE ZARRÉU

PROCESAOS DE LA MINERÍA ABSOLUCIÓN

[ Versión en castellán ]