Dende Darréu queremos amosar la nuesa más enérxica protesta polos
espedientes sancionadores abiertos pola Conseyería d'Economía y Empléu del
Gobiernu asturianu contra Radio Kras de Xixón y Radio QK d'Uviéu, emisores
llibres y comuñales hestóriques n'Asturies, que pueden derivar en multes
d'hasta 200.000 euros y el pieslle de les mesmes.
Denunciamos el llabor de la Xefatura de la Inspección Provincial de
Telecomunicaciones n'Asturies (dependiente del
Ministeriu d'Industria) que realiza actes d'inspección contra les radios
comuñales asturianes mientres el mesmu Ministeriu incumple la Llei de
Comunicación Audiovisual de 2010, que marcaba un plazu de doce meses pal
desenvolvimientu reglamentariu de dicha Llei lo que permitiría l'accesu a
llicencies a les radios llibres y comuñales.
Tratase por tantu d'una midida d'acosu y de criminalización escontra les
radios llibres y comuñales asturianes por una situación d'irregularidá xurídica
que ye responsabilidá de l'Alministración estatal y autonómica.
Asturies cunta con una importante tradición de les denominaes radios llibres
y comuñales qu'empezaron a surdir a principios de los años 80. A pesar del
importante llabor desenvueltu por estes iniciatives ciudadanes nel campu de
fomentu de la cultura asturiana, la participación ciudadana, el pluralismu y
l'exerciciu de la llibertá d'espresión, les distintes Alministraciones
refugaron la reconocencia llegal d'estes emisores dexándoles nuna situación de
precariedá y indefensión.
En llugar d'actuar contra les radios comuñales, ye necesariu que se faiga
efectivu l'artículu 4.1 de la Llei 7/2010, de 31 de marzu, Xeneral de la
Comunicación Audiovisual que textualmente indica “Toles persones tienen el
derechu a que la comunicación audiovisual se de al traviés d'una pluralidá de
medios, tanto públicos, comerciales como comuñales que reflexen el pluralismu
ideolóxicu, políticu y cultural de la sociedá”
Por tou ello MANIFESTAMOS
-El nuesu sofitu y solidaridá coles radios llibres y comuñales asturianes
-Esiximos la paralización inmediata de los espedientes sancionadores y de cualquier midida de presión escontra les radios llibres y comuñales asturianes
-La reconocencia del llabor desenvueltu por estes emisores y la planificación de frecuencies que dea respuesta a la demanda de Servicios de Comunicación Audiovisual Comuñales en Asturies en cumplimientu de lo dispuesto nel artículu 32.2 de la Llei 7/2010
-Esiximos la paralización inmediata de los espedientes sancionadores y de cualquier midida de presión escontra les radios llibres y comuñales asturianes
-La reconocencia del llabor desenvueltu por estes emisores y la planificación de frecuencies que dea respuesta a la demanda de Servicios de Comunicación Audiovisual Comuñales en Asturies en cumplimientu de lo dispuesto nel artículu 32.2 de la Llei 7/2010
Darréu - Mocedá d'Izquierda Soberanista
No hay comentarios:
Publicar un comentario