domingo, 23 de agosto de 2015

1937-2015: la mocedá n’alcordanza del Conseyu Soberanu





Un 24 d’agostu de 1937 firmábase, pa entrar en vigor al día siguiente, el decretu pol que’l Conseyu Interprovincial d’Asturies y Lleón pasaba a convertise en  “Conseyu Soberanu de gobiernu de tol territoriu de la so xurisdicción, y a él queden íntegramente sometíes toles xurisdicciones y  organismos civiles y militares que funcionen y furrulen d’equí p’alantre dientro del  referíu territoriu”.

Con esti decretu Asturies pasaba a asumir les funciones propies d’un estáu soberanu, emitiendo moneda y sellu propio, conformando estructures como exércitu propiu –milicies populares y restos del exércitu republicanu-, policía o marina de guerra, y afitando un gobiernu dividíu n’estayes diverses, dende Guerra fasta Asistencia Social, Sanidá, Obres públiques, Xusticia, Agricultura o Comerciu.

Dende la Mocedá d’Izquierda Soberanista facemos alcordanza un añu más y reivindicamos esta figura como espeyu d’un pueblu dignu, en llucha escontra l’agresión facista y cola clase obrera organizada como motor y propiu gobernante d’esta institución, que durante dellos meses caltuvo la resistencia siendo amás un exemplu d’unidá obrera, axuntando dende seutores comunistes, socialistes, anarquistes, o republicanos, nuna llucha común.

Poro, dende un contestu distintu como l’actual, reivindicamos la soberanía como’l camín pa garantizar los nuesos intereses sociales y nacionales como pueblu, p’aparar el desmantelamientu industrial, el despoblamientu rural, la emigración forciada, el paru y precariedá xuvenil, la represión de les lluches y de la nuesa cultura y llingües, y demás problemátiques que mos imponen les ferramientes propies del capitalismu al que mos alfrentamos güei: dende los gobiernos sucursalistes y títeres de la probetaya autonomía asturiana, fasta’l propiu Estáu español, la Xunión Europea, la OTAN o’l FMI. 

Recuperar la memoria y l’arguyu coleutivu de los bayurosos fechos de llucha popular y antifacista n’Asturies, asina como deprender d’ellos, ye parte fundamental nesi camín haza los finxos que güei reivindicamos p’Asturies: la soberanía política y económica, que namái’l socialismu puede garantizanos.

PUXA’L CONSEYU SOBERANU
PUXA ASTURIES LLIBRE

No hay comentarios:

Publicar un comentario