Como cada añu, el 8
Setiembre fae rescamplar una dicotomía bien clara: una “Asturies oficial”,
remanada por un nacionalismu español basáu nel sucursalismu y manipulaciones
hestóriques como’l cuadonguismu; y frente a ella, l’alternativa que busca dá-y
una visión rupturista a una xornada que ye pa lluchar y reivindicar, y enxamás
pa l’autocomplacencia.
Nun hai nada que
cellebrar pa una mocedá víctima de l’Asturies provinciana, centralista y sumisa,
frutu del réxime del 78. Niveles perimportantes de paru, precariedá pa quien
llega a algamar un empléu, emigración como única alternativa pa poder vivir y
trabayar dignamente, represión pa quien llucha por camudar la situación,
discriminación y opresiones adicionales pa les muyeres pol fechu de selo....
Esta ye la receta que mos ufre l’Asturies dominada poles élites polítiques y
económiques del Estáu español y la Xunión Europea.
Ante esti panorama,
dende Darréu consideramos imprescindible ya irrenunciable siguir construyendo
otru camín, que mos lleve a una Asturies soberana, xusta, llibre, con futuru y
dignidá pa la so clase trabayadora. Esto namái ye posible dende una visión
anticapitalista, a la gueta del socialismu y polo tanto d’un futuru llibre de les
oligarquíes que mos frayen, y de les sos estructures.
Dende la Mocedá
d’Izquierda Soberanista entendemos qu’estos plantegamientos necesariamente
rupturistes, con Asturies como marcu nacional y dende un enfotu tresformador,
tán representaos nes actividaes convocaes n’Uviéu pal 8 setiembre: concentración a les 12:30 nel
Paséu Los Álamos, y actividaes llúdiques posteriormente na Plaza’l Paragües.
Poro, llamamos a la
mocedá asturiano a participar nellos, a siguir reivindicando l’alternativa pa
la nuesa nación esborriando mitos y conquistando realidaes.
No hay comentarios:
Publicar un comentario