Como yá adelantábemos,el cartelu coles actividaes de los díes 9 y 10 d'ochobre yeren solo dalgunes de les previstes pa esti Día de la Mocedá Revolucionario 2015, que va ampliar el clásicu formatu d'una fin de selmana, pa esparder les actividaes per delles selmanes del mes.
A lo llargo'l mes el trabayu de cai tendrá la so presencia con actividaes como la realización d'un mural en Llangréu, cuya temática va tar enfotada na reivindicación d'un futuru dignu pa la mocedá asturiano n'Asturies, escontra la emigración forciada.
El xueves 8 a les 19:00 nel Llar La Llegra, habrá espaciu pa falar alrodiu'l conflictu llingüísticu con una charra. Posteriormente, el vienres 9, nel mesmu Llar La Llegra va ser turnu dende les 18:00 pa un Alcuentru Internacionalista coles delegaciones de les organizaciones xuveniles convidaes, que repasarán distintes cuestiones de la realidá de les sos naciones.
El mesmu vienres rematará na PLAZA LA ESCANDALERA coles actividaes yá anunciaes de la Nueche en danza, que va axuntar tradición y reivindicación tresformadora, mientres que'l sábadu caltién el formatu d'actividaes yá anunciáu, nel que s'inclúin ente otres coses un pasucais escontra la emigración forciada, y el XII Asturies Nun Escaez.
El vienres 16 d'ochobre tocará falar de represión, con una charra-alderique que va desendolcase dende les 19:00 nel xixonés CS La Llume, y que completa'l calendariu d'actividaes del mes d'ochobre nesti DMR 2015.
Tamién hai que recordar qu'ochobre nun fina ehí: la reivindicación republicana por mor de los Premios Princesa, o l'antirrepresiva, col conciertu Ensin Mordaces, son otres dos cites a les que nun se puede faltar.
PUXA LA LLUCHA DE LA MOCEDÁ
VÉMONOS NES ACTIVIDAES DEL DMR 2015
No hay comentarios:
Publicar un comentario