domingo, 4 de octubre de 2015

1934-2015: la mocedá nun escaez




Llega un nueu aniversariu del escomienzu de la revolución asturiana d’ochobre de 1934, y dende la Mocedá d’Izquierda Soberanista siguimos reivindicando y faciendo por que nun s’escaezcan estos fechos tan importantes non solo pa la clase trabayadora asturiana, sinon pal conxuntu de los y les trabayadores del mundu.

Un 5 d’ochobre de 1934, nel contestu d’una fuelga xeneral convocada a nivel estatal, pero que namái tuvo fuercia en territorios mui concretos del Estáu, españaba n’Asturies una revolución obrera que, teniendo les cuenques mineres como epicentru, plantó cara durante unes dos selmanes al reaccionariu gobiernu que dominaba la II República Española n’aquel momentu.

Dende Darréu reivindicamos estos fechos dende dos vertientes: l’alcordanza hestórica, y el deprendizaxe pal contestu d’anguaño. Paeznos perimportante nun dexar nel escaezu a eses obreres y obreros que, xuníos baxo’l llema del UHP, desendolcaron un intentu de rotura pa col capitalismu dende la unidá de seutores dispares, como socialistes, comunistes y anarquistes.

Nesi sen, tamién nos paez importante señalar el desendolcu d’esti procesu revolucionariu dende l’autoorganización de la clase trabayadora asturiana, nún de los munchos exemplos d’aquella dómina qu’amuesen que’l nuesu pueblu nun tien mieu a caminar pela so propia realidá, pel so propiu camín, cuando ye necesario.

Hai entovía muncho qu’analizar y deprender d’aquellos fechos, y estrayer enseñances que mos ayuden a siguir avanzando na Asturies del añu 2015, distinta nes formes, pero asemeyada nel fondu: sigue la explotación del capitalismu a la nuesa clase trabayadora, al traviés de les mesmes y otres estructures.

Siguimos sufriendo les crisis cícliques d’esti sistema, y les sos rempuestes en forma de gobiernos y polítiques reaccionaries. Siguimos necesitando puxar por un camín de soberanía pal nuesu pueblu, nel que seyamos quien a decidilo too, a organizanos y gobernanos atendiendo a los nuesos intereses. Siguimos viendo cómo ensin llucha y organización, nun ye posible asaltar el cielu.

PUXA OCHOBRE’L 34
PUXA ASTURIES LLIBRE Y SOCIALISTA

No hay comentarios:

Publicar un comentario