lunes, 12 de octubre de 2015

#DMR2015: Crónica de les actividaes del 8, 9 y 10 d’ochobre







Les actividaes del Día de la Mocedá Revolucionario d’esti añu 2015 entamaron el xueves pela tarde con una charra nel uvieín Llar La Llegra, a cargu de Santi Fano alrodiu’l conflicto llingüísticu n’Asturies. Nella’l ponente fizo un perinteresante repasu de la situación sociollingüística, asina como de la trayeutoria del propiu movimientu reivindicativu. Tampoco faltaron les propuestes y llinies a siguir, con un mensaxe perclaru: la movilización, el conflictu, l’activismu, son la base imprescindible pa llegar a una solución.




El vienres retomábense les actividaes en La Llegra con un Alcuentru Internacionalista nel qu’ Arrán (Païssos Catalans), Ernai (Euskal Herría), Agora (País Llionés), Yesca (Castiella), Isca y Briga (Galiza) y Jaleo (Andalucía) falaron alrodiu cuestiones especifiques de los sos respeutivos países, como la llucha antifascista en Castiella, el papel de la mocedá nel procesu soberanista catalán, la situación del movimientu independentista andaluz, dinámiques de xunidá xuvenil en Galiza, etc, una perbona oportunidá pa deprender de les lluches n’otres naciones y aldericar.



A les 21:00 d’esi mesmu vienres foi turnu de la primer actividá na carpa asitiada na Plaza La Escandalera: la Nueche en Danza. Cientos de persones participaron tanto nel taller de baille, como colos grupos Caldo y Os Rabizos, Xeitu, y Fitoria, asina como nel posterior micru abiertu. La reivindicación de la nuesa cultura y los sos elementos coleutivos y socializadores amosó abonda vitalidá, na primer nueche d’esti tipu que se desendolca n’Uviéu.



Con ello remató’l vienres, anque’l sábadu entamó yá na mañana con xuegos tradicionales y una xinta popular na Escandalera, actividaes llúdiques y de xermandía que sirvieron pa estrechar venceyos y sacar a la cai un día más dalgunos de los nuesos raigaños como pueblu.


A les 19:00 salió dende la estación de Renfe d’Uviéu un pasucais combativu, pol futuru de la mocedá y escontra la emigración forciada. El mesmu, entamáu por Darréu, La Llume, La Llegra, Nora Antifa y Xunta Estudiantil Asturiana, percorrió numberoses cais del centru uvieín, glayando reivindicaciones como “Preparaes pa emigrar, obligaes a lluchar”, “Escontra’l paru, llucha obrera”, “Asturies llibre, poder popular”, o “Asturies nun se viende, Asturies se defende”. Tamién hebo espaciu pa la reivindicación estudiantil sobre esta cuestión, asina como pal testimoniu d’una compañera obligada a emigrar tiempu atrás, esto último xunto a la simbólica estatua del viaxeru asitiada na Plaza Porlier.



Posteriormente tornaba l’actividá a la Plaza La Escandalera, con un actu políticu previu al conciertu, nel que se trató alrodiu soberanía y feminismu, nun par d’intervenciones dende la perspeutiva moza. Les intervenciones siguieron a lo llargo’l conciertu, con espaciu pa l’alcordanza hestórica, y tamién pal internacionalismu, con una intervención de les delegaciones internacionales presentes.




La xornada finó col XII Asturies Nun Escaez, nel que cientos de persones pudieron esfrutar de baldre de la música reivindicativa de K-Nalón, Adizión Etílika, Brutus Daughters y Skontra.






Dende la Mocedá d’Izquierda Soberanista nun podemos facer más que dar les GRACIES a les delegaciones internacionales que mos acompañaron, a los grupos de la Nueche en Danza y el XII Asturies Nun Escaez pol so compromisu, y a toes y toos vosotros pola participación popular en toles actividaes, nes qu’hebo espaciu pa la reivindicación, la llucha, l’alcordanza y la folixa.  Pero equí nun acaba ochobre: entá queden actividaes como la charra alrodiu represión nel CS La Llume, o’l murial reivindicativu en Llangréu.

AVANTE LA LLUCHA DE LA MOCEDÁ

PUXA OCHOBRE’L 34

PUXA ASTURIES LLIBRE Y SOCIALISTA

No hay comentarios:

Publicar un comentario