La mocedá escontra’l circu borbónicu: ¡Asturies llibre de monarquía!

Yá tán equí de nueu: actos elitistes, fartures continues, estáu policial… ye’l circu borbónicu, qu’un añu más enllena Uviéu nel mes d’ochobre pal llavar la cara a una monarquía española corrupta y antidemocrática.

Ye una cuestión de dignidá: nun toleramos instituciones basaes en criterios de sangre, nin la ostentación pagada con sovenciones públiques, d’unes élites polítiques y económiques qu’afueguen a una mocedá asturiano condergada al paru, la precariedá, y la emigración d’unes 40 moces y mozos a diariu.

La imposición d’una institución como la del “Principado”, sobre la que’l pueblu asturianu enxamás tuvo oportunidá de decidir democráticamente, ye una buena amuesa del calter reaccionariu d’un Estáu español que cada vegada quita más la mázcara, pa espeyar la so auténtica realidá d’opresión al humilde, y uniformización cultural pa los pueblos que lu componen.

La Mocedá d’Izquierda Soberanista reivindicamos decididamente los valores republicanos, pero facémoslo dende una perspeutiva nacional asturiana: puxamos por una República Asturiana, socialista y soberana, como proyeutu col que frayar non namái coles opresiones de clase propies del capitalismu, o de xéneru propies del patriarcáu, sinon tamién cola opresión nacional implícita nel proyeutu de les élites que ye l’Estáu español.

Ye por ello que llamamos a movilizase’l 23 d’ochobre, participando na concentración que va desendolcase na Plaza La Escandalera dende les 17:00, dientro’l bloque soberanista, pola ‪#‎RepúblicaAsturiana‬, escontra’l “Principado”, escontra la humildación monárquica, por un pueblu llibre y democráticu.

REPÚBLICA ASTURIANA, SOCIALISTA Y SOBERANA