El 20 de payares garra dende la muerte del dictador Francisco Franco un simbolismu bien afayaízu pa la reivindicación antifacista, nun país como Asturies nel qu’entá vemos acaldía les consecuencies d’aquella sangrina imposición del capital nes sos formes más estremes.
Nun ye novedá que nos últimos meses vienen asocediendo dellos episodios n’Asturies que propiciaron l’apaición de rempuestes plurales y organizaes énte’l facismu, siendo Nalón Antifacista o Xixón Antifacista dalgunos exemplos d’ello, que vienen a xunise a otros coleutivos d’esi calter yá esistentes.
Dende Darréu consideramos imprescindible el papel de la mocedá nesta cuestión, y ye que ye la xuventú ún de los principales seutores sociales nos que les organizaciones neonazis y facistes intenten pescar. Sicasí, tamos convencíes y convencíos de que, con concienciación y aición, nun hai espaciu pal so espoxigue.
Nun queremos escaecer que’l facismu nes sos distintes formes, nun ye más qu’una espresión del capitalismu: la estética y discursu pseudoobrerista y pseudorevolucionario, nun son más que poses que queden fácilmente desenmascaraes a poco qu’afondemos tanto nos sos plantegamientos teóricos, como na so praxis.
Ye por ello que dende la Mocedá d’Izquierda Soberanista, aprovechamos esta fecha pa tornar a reivindicar l’antifacismu como ún de los pegollos fundamentales pa cualquier coleutivu de mocedá combativo n’Asturies, un país perafeutáu por una crisis permanente que dexa miseria, probitú, y escases perspeutives d’un futuru dignu. Y ante ello, nun val el racismu, la xenofobia, la homofobia, o’l machismu: namái val la llucha por una sociedá verdaderamente llibre en toles sos facetes.
ASTURIES ANTIFACISTA
No hay comentarios:
Publicar un comentario