La mocedá en defensa’l patrimoniu asturianu

Son munchos los ámbitos nos que’l retrocesu y l’esaniciu tán afeutando al nuesu país: dende lo llaboral, lo demográfico, o lo cultural, pero tamién a otres estayes más escaecíes. Una d’elles ye la tocante al patrimoniu asturianu, especialmente no arquitectónico.

Ye una realidá la dexadez institucional xeneralizada respeuto al caltenimientu y puesta en valor d’esti patrimoniu, con un abandonu y esbarrumbe d’abondos horros y paneres, de patrimoniu venceyáu a la memoria hestórica (como’l rellacionáu cola guerra civil), d’un prerrománicu amenazáu énte la falta d’un tratamiento afayaízu, de castros escaecíos, de patrimoniu industrial ensin plan nengún… son namái dalgunos de los munchos exemplos que podemos güeyar acaldía nel nuesu país.

Ye por ello que dende Darréu consideramos que nun podemos quedar nuna situación de pasividá énte esta situación bien llaceriosa, faciéndose necesario que toes y toos garremos concencia d’esta problemática y, como pueblu, faigamos por dá-y la vuelta a la tortiella y avanzar nel caltenimientu d’un patrimoniu que ye irremplazable y pervaloratible, pal conxuntu de la población, pero con importancia mayor pa una mocedá que ye heriede de too ello, y enfotada en que siga siéndolo bayura tiempu más.

Nun podemos esperar una aición benefactora o d’iniciativa propia d’unes instituciones asturianes que, polo xeneral, amuesen de contino non solo nun tar interesaes nesti asuntu, sinon qu’a vegaes son les primeres n’agredilu y esfarrapalu. Somos el pueblu una vegada más los que tenemos que defender Asturies, y la mocedá tien de ser motor.

POLA DEFENSA’L NUESU PATRIMONIU
ASTURIES RESISTE