Nesti
mes de xunu el pueblu asturianu vuelve a tar llamáu a les urnes, pa
unes nueves eleiciones estatales, depués de que l’aritmética
parllamentaria nun diere suficiente pa la investidura de nengún de los
aspirantes.
Dende
la Mocedá d’Izquierda Soberanista paeznos que, pol contestu políticu y
social nel que nos atopamos, la nuesa postura nun debe camudar no
esencial respeuto a lo manifestao nes eleiciones d’avientu de 2015:
enfrentámonos a un sistema estatal, económicu, territorial, políticu,
social… desacreditáu dafechu, en crisis permanente no que cinca a
Asturies, y ensin ufrir y nin siquier plantegar posibles soluciones a
les perimportantes problemátiques que sufrimos la mocedá: paru,
precariedá, emigración, crecimientu de la represión a la protesta, y en
definitiva falta de condiciones y perspectives d’una vida emancipada y
digna.
Nesi
sen, consideramos que les fuercies polítiques que dende la izquierda se
presenten a esti procesu eleutoral pela “circunscripción asturiana”,
destaquen más poles ausencies que poles inclusiones, y non solo nun
foron a meyor nestos meses, sinon que retrocedieron. Como yá dicíemos
anteriormente: falta una vegada más un calter netamente asturianu nos
procesos organizativos (marcaos como siempres por estructures directives
de fuera, y non polos tiempos y especifidaes propies), y falta un
proyeutu tresformador de y pa esti país llamáu Asturies, pa lo qu’habría
que principiar por reconocelu como suxetu políticu ensin les
ambigüedaes calculaes de programes y llemes que busquen más contentar a
determinaos perfiles eleutorales, que ser consecuentes col cacarexáu
discursu federalista, qu’aveza a repetir el viciu centralista “dende
España haza los Pueblos”, o dende “un país”, o dende “la patria”
(española).
No
rellativo a polítiques concretes pa la mocedá asturiano, más de lo
mesmo. Na mayoría de los casos ausencia total de propuestes nesi y en
casi cualquier otru tarrén. N’otros casos, de nueu ambigüedá o
insuficiencia, mentantu siguen siendo miles les moces y mozos d’Asturies
que se ven obligaes a marchar del so país pola falta de soluciones
concretes, que tienen de ser yá de choque pola gravedá de la situación y
la so persistencia.
Siguimos
tamién considerando que l’apueste de delles organizaciones ya
individualidaes soberanistes d'Asturies por aquelles candidatures de
vocación estatal que-yos pudieron paecer “menos males” son
curtioplacistes, y nun pueden suponer avance nengún na construcción d’un
discursu nacional asturianu. En tou casu, creyemos que’l camín ye
distintu, y nun pasa por siguir centrando tiempu y esfuerzu nes
estratexes entristes que, como un bucle ensin fin, van repitiéndose en
distintes versiones a lo llargo los años y los procesos eleutorales, con
duldosu ésitu.
Ye
por ello que siguimos enfotaes na necesidá de construyir un espaciu
políticu xunitariu y autónomu de la izquierda soberanista asturiana, que
sirva p’afitar y desarrollar un proyeutu ideolóxicu, estratéxicu ya
incluso estructural común, y puea siguir llevándolu a la práutica na
cai y nos espacios de llucha dende una perspeutiva de movimientu. Ye
por ello que sofitamos la campaña “Un pueblu en movimientu mirando al futuru”, entamada dende l’espaciu #LluchandoPolaSoberanía,
y que ta llevando a les cais del país un discursu non eleutoralista,
bien claru, y que compartimos: Axuntar fuercies dende la izquierda,
Construyir alternatives soberanistes, y Avanzar haza un Procesu
Constituyente Asturianu. Les trés coses xuntes.
Pa
finar, insistimos en que dende la nuesa perspectiva Asturies, de nueu,
va ser un convidáu de piedra, y les problemátiques de la mocedá
asturiano van siguir ensin una solución que namái vamos algamar dende la
organización popular, la llucha diaria, y el trabayu alrodiu d’una
riestra reivindicaciones concretes totalmente escaecíes polos partíos
representativos.
Ye
por ello que nun llamamos al votu pa nenguna candidatura, y sí facemos
un llamamientu dende la mocedá a los y les soberanistes d’Asturies, pa
fortalecer esi otru camín que mira lloñe, con independencia de los
resultaos. Porque la organización, movilización, y llucha na cai, ye y
va ser más necesaria que nunca, pa ganar lo que nun nos van regalar
dende nenguna institución d’esti Estáu.
No hay comentarios:
Publicar un comentario