Esti 26 de xunetu cúmplese un nueu aniversariu dende’l triunfu de la revolución cubana, depués d’años de llucha y dando fin al dominiu colonial que, primero d’España y llueu d’Estaos Xuníos, espolió la islla y la so xente durante décades y décades, onde l’analfabetismu o una curtia esperanza de vida yeren lo avezao pal pueblu trabayador.
Son munchos los llogros internacionalmente reconocíos d’estes décades de socialismu: nel tarrén educativu o nel sanitariu, vemos cómo la revolución cubana asitióse como referente llatinoamericanu, esportando amás la so solidaridá a numberosos países del so continente, y tamién d’otros como África.
Décades de bloquéu económicu, d’acosu y derribu tres l’esbarrumbe del bloque socialista, nun foron suficiente pa facer que Cuba doble les rodielles, ya incluso en plena ofensiva imperialista en países averaos, como Venezuela o Brasil, sigue siendo Cuba ún de los pocos oasis de dignidá popular qu’atopamos nun mundu domináu pola lóxica neolliberal, pol capitalismu más xabaz y explotador.
Nesi sen, consideramos imprescindible deprender del camín socialista desendolcáu por Cuba, y treslladar dende Asturies la nuesa solidaridá y puxu, pa que’l proyeutu alternativu al capitalismu cunte entá con un llargu percorríu nel que seya’l pueblu’l dueñu del so destín y de los sos recursos, reforzando’l socialismu como única vía posible pa nun tornar a les condiciones de la etapa colonial. Tamién, como internacionalistes, nun hai meyor forma de sofitar y facer homenaxe, que siguir n’Asturies na llucha pola construcción del socialismu na nuesa tierra.
La explotación de los nuesos recursos naturales pa intereses ayenos al pueblu asturianu, el pieslle programáu de seutores económicos en función a les necesidaes de les oligarquíes, el paru y la precariedá que mos nieguen un futuru na nuesa tierra, o mesmamente la insostenible decadencia demográfica que carecemos, faen evidente que n’Asturies ye pernecesario y urxente garrar conciencia de que’l capitalismu y les sos estructures, son la nuesa ruina.
PUXA LA REVOLUCIÓN SOCIALISTA CUBANA
PATRIA O MUERTE
No hay comentarios:
Publicar un comentario