8-S: la mocedá na cai faciendo país

Esti 8-S tenemos bien poco que cellebrar, pero munches razones pa salir a la cai. Como tolos años, dende les instituciones y medios de comunicación presenten esti día dende un rellatu cuadonguista, d’Asturies como “cuna d’España”, y enfotándose tamién na so vertiente relixosa. Tal podría dicise que nesti día, el discursu oficial poco camudó dende los años del nacional-catolicismu. Quiciabes seya una seña. 

La mocedá asturiano refugamos esi rellatu porque, amás de falsu, ye’l raigañu de tolos nuesos problemes: escuende una conceición d’Asturies fondamente pasiva, centralista y sucursalista, na que nun hai soluciones especifiques, pa problemes específicos. Un 57% de paru xuvenil (perriba la media estatal), el desmantelamientu industrial, el despoblamientu rural, y en definitiva l’escaezu dafechu de cualquier política específica que faiga posible un futuru n’Asturies pa la mocedá, son el meyor reflexu de too esto.

Ante esti panorama, paeznos que ye importante la denuncia de la situación, pero por supuestu tamién la gueta d’alternatives y, sobre too, la organización y la llucha pa cambialo. Ye por ello perimportante que n’Asturies recuperemos la dinámica movilizadora, que tornemos a tar nes cais defendéndonos ante previsibles nueves polítiques regresives, y tamién reclamando un proyeutu alternativu qu’hai que siguir construyendo.

Consideramos polo tanto que la opción afayaíza pa esti 8 Setiembre ye la manifestación “Ganar la cai faciendo país”, entamada pola dinámica Lluchando Pola Soberanía, porque nun va haber alternativa nin pa la mocedá asturiano nin p’Asturies en conxuntu si nun avanzamos pel camín de la soberanía, del poder del pueblu asturianu pa los sos propios intereses, de la superación del sistema capitalista, y de les sos estructures.

Esti 8-S, la mocedá tien de tar na cai a les 13:00 nel Paséu Los Álamos d’Uviéu. Ganando la cai y faciendo país.