¡Nun merques xuguetes sexistes!

Cola llegada de les feches navidiegues, el capitalismu y el patriarcáu aporten a una época na que son abondos los exemplos de lo perxuicioso d’estos sistemes de dominación, del consumu desenfrenáu, de la esistencia de roles de xéneru… quedando más n’evidencia que nunca les formes de reproducción d’estes construcciones sociales y económiques, d’estes llaceries qu’hai que valtiar.

Una de les más llamatives podemos atopala nel seutor xugueteru, d’especial rellevancia al dir dirixíu a neñes y neños a los que van llantá-yos na tiesta los roles que tienen qu’ocupar na sociedá, por mor del so sexu. Nesi sen, vemos por exemplu cómo les muñeques, o los xuguetes rellacionaos col trabayu domésticu, van empobinaos esclusivamente a les neñes, demientres que los venceyaos a los neños trescurren per víes como la construcción, los coches, muñecos d’aición… 

Entendemos dende Darréu qu’esta realidá nun ye natural nin inmutable: los roles de xéneru son una construcción social que, nel casu concretu nel que mos movemos, busquen un modelu afayaízu pal caltenimientu del patriarcáu, a costa de les esplotaciones opresiones, y formes de dominación qu’afeuten de forma direuta y pergrave a les muyeres. Poro, nun se puede consentir qu’estos roles lleguen impunemente a la reciella y la mocedá, somorguiaos pola maquinaria publicitaria, mediática y educativa, pa facer, pensar y ser lo que’l poder quier que faigamos, pensemos, y seyamos.

Asina ye que la Mocedá d’Izquierda Soberanista vamos a visibilizar nel nuesu país esta problemática durante’l nadal, con una campaña propagandística empobinada a frayar colos roles de xéneru impuestos, al refugu del patriarcáu en toles sos formes, y a facer ver que ye posible y necesariu un modelu de sociedá nel qu’estes problemátiques ya inxusticies nun sigan vixentes nin un segundu más.

PATRIARCÁU Y CAPITAL, ALIANZA CRIMINAL