lunes, 8 de mayo de 2017

La mocedá, ¡pola oficialidá!


Otru añu más con motivu del Día de les Lletres Asturianes, la XDLA entamó la manifestación pola oficialidá del asturianu y el gallego-asturiano. Na mesma, Darréu participó dientro'l bloque #LluchandoPolaSoberanía, onde foi bien destacable la presencia de xente mozo nun contestu como'l de l'Asturies d'anguaño, carauterizáu pol avieyamientu y la emigración xuvenil.

Ye ésti en sí mesmu un motivu d'esperanza pa les nueses llingües y el so futuru, y ye que la tresmisión xeneracional de la llingua ye clave, asina como tamién el fortalecimientu del movimientu reivindicativu dende la mocedá. 


Nesi sen, consideramos l'activismu de cai una ferramienta a recuperar con mayor intensidá na llucha polos nuesos drechos llingüísticos.Ye por ello que con motivu del Día Les Lletres ficimos un nueu mural reivindicativu nel conceyu de Noreña, pa siguir espeyando nes cais lo que ye una demanda social inorada por unes instituciones aculturadores ya inoperantes.

La llucha pola soberanía del nuesu país tien munches vertientes: la económica, la social, la cultural, la política... toes elles rellacionaes, pero tamién coles sos cuestiones concretes. Nesti casu, defendemos la soberanía como l'únicu camín que va garantizar una Asturies llibre de les opresiones que venimos careciendo, onde heba un proyeutu con visión de Pueblu, de País, de Clase, de Xéneru...Como bien dicía ún de los cartelos presentes nel nuesu bloque, faen falta + FECHOS Y - XESTOS.

¡LA LLUCHA SIGUE!

No hay comentarios:

Publicar un comentario