Un 8-S na cai, una mocedá por un país nuevu

El pasáu vienres salimos a la cai pa facer visible una vegada más la reivindicación social y nacional al traviés de los actos entamaos por Lluchando Pola Soberanía. Na manifestación fízose visible la participación de dellos coleutivos sindicales, centros sociales, reivindicación LGTB, estudiantil, antirracismu, drechu a la vivienda digno... espeyando asina qu'eses lluches vieyes, esa tradición de la clase trabayadora asturiana, sigue bien viva al traviés de diverses iniciatives y sensibilidaes.

Pela nuesa parte, participamos dende la óptica xuvenil, con una intervención política al final de la manifestación na que ficimos repasu a los problemes que sigue careciendo la mocedá asturiano, pero poniendo especial enfotu na necesidá de nun cayer nel pesimismu y siguir enanchando les lluches dende la mocedá. Amás d'ello, punximos el nuesu puestu d'información y material, tanto na xinta popular posterior a la manifestación, como nel conciertu entamáu pola Casa Conceyu de Riosa nesa mesma tarde-nueche.

Asina, un 8-S más quedó nidio qu'hai otra Asturies distinta a la de l'autocomplacencia institucional, l'aculturación, y la miseria: de l'Asturies que nun se rinde, y llucha por un país consciente y arguyosu de la so identidá, con concencia de clas, y decidíu a frayar con llaceries como'l capitalismu, el patriarcáu, o la falta de soberanía de los pueblos que componen l'Estáu español.

Como cada añu, esti 8 setiembre podemos ver la esistencia de dos visiones contrapuestes nel nuesu país: per un llau la oficial, institucional y del poder que mos amuesa esta fecha y Asturies en xeneral dende una perspeutiva folclórica, idílica y que defín al nuestru país como una rexón periférica y venceyada al españolismu, pa lo qu'emplega los mitos cuadonguistes más rancios. Per otru llau ta l’Asturies que nun se rinde, qu'apuesta por sí mesma y pol so Pueblu pa construyir un país xustu, más llibre y que nun s'avergoña de la identidá nacional asturiana nin de la necesidá de superar el capitalismu y el patriarcáu.

Pa la mocedá asturiano nun hai alternativa a la hora d’escoyer: esa Asturies oficial, la del sucursalismu, la del paru, la de la precariedá, la de la emigración forzada, supón miseria y falta de futuru pa nós, mozos y moces. Poro, como dicimos, hai namái una vía si queremos algamar un futuru dignu nel nuesu país: apostar pol camín de la soberanía del Pueblu Trabayador Asturianu y, poro, p’Asturies.

Nun hai munches novedaes positives que cuntar sobre la situación de la mocedá asturiano: el paru sigue tando nunes tases de les más elevaes d'Europa, la temporalidá sigue suponiendo más del 90% de los nuevos contratos firmaos, los puestos de trabayu esistentes carauterícense pola precariedá... con too ello, les nueses posibilidaes d'emancipanos, algamar vivienda digno, y en definitiva vivir y trabayar nel nuesu país nunes condiciones afayaíces, ye una utopía pa la mayoría de moces y mozos, condergaos a la emigración forciada.

Y yá si axustamos un poco más el focu, vemos que nel casu de les moces la situación ye entá pior: la brecha salarial esistente nun dexa de medrar y llidera les estadístiques estatales; los casos de violencia y acosu machista, per desgracia, nun mengüen ya incluso medren, y asistimos en resume a les desgracies causaes por un sistema patriarcal nel que les muyeres enxamás van algamar la igualdá y, polo tanto, ye necesario siguir lluchando y concienciando pa superar esa cadarma opresora y opresiva.

Ye por ello qu'entendemos qu’un 8 de setiembre más, hai que convertir esta fecha nun día nel que dexar bien claro que la vindicación de soberanía política y económica ye'l camín d'Asturies énte tanta imposición ayena a los intereses de les y los trabayadores d'esti país. El camín d'Asturies ye'l de la soberanía y el socialismu, y ye que paeznos bien claro que creyer posible la soberanía del nuesu pueblu dende parámetros capitalistes, nun ye más qu'una broma de mal gustu qu'eso sí, vendría perbién a les estructures que güe nos someten: el Reinu d’España, la Xunión Europea, y la propia Xunta Xeneral.

Ye por ello que tamos equí xunto a toles y tolos que creyemos posible y necesariu un cambiu social, y nós tenemos bien claro qu'esi cambiu requier de la construcción d'un país nuevu, de construyir la nuesa soberanía, pero ensin escaecer quién somos, nin d'ónde venimos como pueblu.

Un añu más, 

PUXA LA LLUCHA DE LA MOCEDÁ
PUXA ASTURIES LLIBRE, SOCIALISTA Y FEMINISTA