Llegó’l día de la sacrosanta Constitución
Española: esa cola que tanto s’enllena la boca nos últimos meses la “democracia
española”, los sos representantes políticos, los sos tertulianos de cabecera,
los cabezaleros de la patronal… Pero detrás de la pallabrería, el maquillaxe y
la manipulación, intenten tapecer una realidá que rescampla.
Siguen vendiéndomos el rellatu de la
transición modélica, qu’escuende represión, facismu, claudicaciones, ya
imposiciones militares, a lo qu’hai qu’amestar que marcos como l’Estatutu d’Autonomía
asturianu, deriváu de dicha constitución, nun pudo siquier ser votáu poles
asturianes y asturianos, igual que la institución del “Principado”, y cualquier
otra cuestión que, simplemente, se mos impuso ensin cuntar cola opinión direuta
d’un pueblu que dende entós vive’l desmantelamientu de los sos recursos productivos,
el clientelismu y corrupción político-institucional, o’l colonialismu
enerxéticu, ente otres coses.
Refugamos la farsa constitucional, igual que
refugamos cualquier constitución surdía de la imposición de les élites al
pueblu trabayador. Refugamos la farsa constitucional, igual que refugamos
cualquier modelu basáu na opresión nacional y nel somorguie de les naciones
que componen l’Estáu español. Amás, por más que quieran convencenos de lo
contrario, la llegalidá que surde d’esi testu constitucional nun ye más que
papel moyao, cumplíu o non en función de los intereses de la clas dominante y
los sos executores políticos: ¿ú ta la subordinación de la riqueza al interés
xeneral? ¿ú ta’l derechu al trabayu y la vivienda? ¿ú ta aquello de que les
llingües de les distintes comunidaes sedrán oficiales nel so territoriu?
En definitiva, consideramos qu’esti modelu nel
que tien de movese’l pueblu asturianu, ye contrariu dafechu a los sos intereses
como pueblu trabayador y como nación, una amarraza qu’hai que frayar pa
construyir dende la soberanía de los pueblos, el socialismu y el feminismu. Pa
que nun seya ésti’l modelu dende’l que se mos imponga la política enerxética
del futuru, o les lleis llaborales, o’l modelu sanitariu y educativu, o pa que’l
modelu económicu especulativu nun tenga espaciu. Pa que la mocedá d’esti país
pueda a la fin construyir una vida digna ensin tener qu’emigrar a la fuercia,
dientro o fuera l’Estáu español.
Ye imprescindible polo tanto l’autoorganización
de la mocedá, esparder estes cuestiones y, sobre too, concienciar de que’l
rellatu nel sistema educativu, nos medios de comunicación… sobre’l marcu
constitucional del 78, nun ye más que manipulación, mentira y farsa al serviciu
del réxime.
Frayémoslu dende la mocedá. Llevantemos una Asturies llibre.
ABAXO’L RÉXIME DEL 78
No hay comentarios:
Publicar un comentario