miércoles, 21 de febrero de 2018

21 de Febreru: Les nueses llingües, nes nueses manes



Güei ye’l Día Internacional de la Llingua Materna, una fecha bien afayaíza pa la reivindicación nun contestu como ésti, marcáu pola desigualdá de derechos ente los falantes d’asturianu y gallego-asturiano en comparanza col castellán, y en plena fola mediática sobre la posibilidá de la oficialidá.

Dende la mocedá tenémoslo bien claro: les nueses llingües son, por supuestu, parte de la nuesa identidá y del nuesu pasáu como pueblu, pero sobre too querémosles como ferramientes del presente y del futuru. Ye por ello que la oficialidá ye l’únicu camín posible, l’entamu d’una vía que tien de siguir colos correspondientes planes normalizadores y de promoción en tolos ámbitos: medios de comunicación, servicios públicos, instituciones… valtiando una dinámica que non solo afeuta a lo llingüístico, y ye qu’esa cuestión nun ye más qu’otru reflexu de l’Asturies sucursalista, provinciana, aculturizada y decadente que mos lleven imponiendo durante décades. 

Nel contestu d’anguaño vemos cómo medren los ataques mediáticos escontra les nueses llingües propies, casi siempres venceyaos a la prensa, la patronal, u organizaciones polítiques que nel meyor de los casos podemos asitiar nesi espaciu conocíu como “la derecha”. Paeznos que ye una amuesa más de que, como yá dicía Conceyu Bable 40 años atrás, la defensa de les nueses espresiones culturales son la defensa mesma de les clases populares asturianes: de la xente trabayaor, campesín, de les que caltienen con vida los pueblos y villes, de les que lluchen por un país que nun quede amenorgáu a esa “Ciudá Astur” afogada pola contaminación y la falta de futuru pa una mocedá qu’emigra a miles. En definitiva, ye la llucha por un futuru pal nuesu país, pal so pueblu, n’antagonismu pa coles élites polítiques y empresariales que mos tán llevando al desaniciu. 

Dende Darréu somos conscientes que’l tarrén institucional ye parte que nun se puede escaecer en toes estes cuestiones: la oficialidá tien de llegar al traviés d’un procesu de reforma del estatutu, la recuperación toponímica o’l furrulamientu y puesta en marcha de los Sevicios de Normalización cunta con un importante componente políticu conceyil, asina como’l desendolcu de promoción ente la mocedá, o la configuración del propiu sistema educativu o l’entramáu alministrativu nes manes del gobiernu asturianu… Pero como llevamos viendo toos estos años, la confianza nos representantes que desarrollen toes estes xeres tien de ser llimitada, y cuntar siempres con un movimientu popular que puxe y presione pa que, amás de nun dar pasos atrás se dean pasos alantre. Ye por ello que la mocedá, como ún de los seutores llamaos a dinamizar la nuesa sociedá y les nueses lluches, cuntamos con un papel imprescindible en reactivar y fortalecer la reivindicación popular y de cai, que nun puede quedar tapecida dafechu por un xuegu institucional siempres traicioneru y cambiante.

Siguimos dando pasos alantre, y ye necesario siguir dándolos espeyando nes cais que, como dende va décades, nun vamos callar nin dexar de glayar enxamás hasta consiguir que la marxinación y la desigualdá de les nueses llingües desapaezca, igual que tampoco vamos callar hasta que consigamos acabar cola esplotación llaboral, el paru, la precariedá, la emigración, el machismu… Hasta qu’algamemos polo tanto una sociedá xusta dafechu. Ta nes nueses manes como pueblu y como reivindicación popular: ta nes nueses manes como mocedá consciente y organizao.

¡Oficialidá Yá! ¡Oficialidá Xa!

No hay comentarios:

Publicar un comentario