La xornada entamó de la man de Santi Fano, compañeru de la Xunta Estudiantil Asturiana y espertu en nueves teunoloxíes y redes sociales d'internet. Ufrionos una visión amplia y crítica d'internet y les tan mentaes anguaño "redes sociales" y tolo que tienen detrás. El compañeru presentonos dende una perspeutiva mui pedagóxica les estratexes represives y de control social qu'hai nes redes, pero tamién ufrionos ferramientes que pueden apoyanos na llucha na rede, entendiendo qu'internet y tolo qu'arrodia al mesmu ta equí pa quedase y que con responsabilidá podemos emplegar la rede como una ferramienta de llucha más.
Depués, dende Darréu presentamos el nuesu actu políticu a les decenes de persones asistentes baxo'l llema "¿Paru o emigración? ¡Escoyemos Revolución!". Dende Darréu amosamos el nuesu posicionamientu sobre la situación de la mocedá asturiano y anguaño y les perspeutives de futuru. Empobinamos a los y les presentes el xunise a la llucha pola soberanía política y económica d'Asturies como únicu garante de resistencia énte la Troika, l'Estáu Español y les imposiciones del neolliberalismu. Entendemos que la soberanía y el socialismu son los pegoyos nos que tien d'asitiase un procesu d'unida popular y llucha revolucionaria n'Asturies si queremos aportar a un escenariu de progresu, estabilidá y xusticia.
Pesllamos la xornada con un pinchéu a precios populares col envís d'autoxestionanos un pocu y crear un espaciu d'alcuentru más distendíu ente la xente asistente. Dende Darréu queremos agradecer a la CSI el fechu de cedenos el llocal d'Uviéu, el prestosu trabayu de Santi Fano na so charra y l'asistencia de toles persones que tuvieron con nós.
¡La llucha sigue! ¡Asturies necesita d'una mocedá crítico y combativo!
No hay comentarios:
Publicar un comentario