Una parte perimportante d’esti eventu ye financiada con dineru público, nun momentu d’emerxencia social nel nuesu país: cifres de desemplegu hestóricamente altes, entá más graves nel casu de la mocedá; precariedá llaboral, más de 100.000 persones baxo l’umbral de la probitú, etc. Poro, consideramos una vergoña que, nes condiciones d’anguaño, estos premios reciban cualquier sofitu públicu.
D’otru lláu, tamién queremos denunciar la vertiente aculturizadora y reaccionaria d’un eventu que bombardia d’ “españolidá” ‘l nuesu país al traviés de toles ferramientes mediátiques posibles, siendo la mocedá ún de los oxetivos del espardimientu de valores elitistes contrarios a valores igualitarios, democráticos, y de respetu a la diversidá cultural que defendemos dende Darréu.
Nun hai qu’escaecer que la institución de “Principado” impúnxose n’Asturies tres la derrota militar d’Asturies en delles batalles escontra Castiella, tres varios intentos independentistes. Poro, ye una institución impuesta y antidemocrática que refugamos dafechu. Asturies nun ye nengún Principáu. Asturies nun tien rei.
Poro, consideramos imprescindible que’l pueblu asturianu, y n’especial la mocedá, se movilice non sólo nesti día, sinon a diariu pa dexar claro que l’Asturies real nun quier monarquía, sinon una tresformación que derive na soberanía y el socialismu, o lo que ye lo mesmo, un futuru dignu, pa los y les asturianes.
Convocatoria xunitaria.
Dellos coleutivos sociales y de trabayadores convocaron una concentración de protesta contra los Premios Príncipe, lo que suponen y en denuncia pola situación pergrave que vive Asturies. Entienden, como nós, que l'Asturies real nun tien nada que cellebrar. La concentración sedrá esti vienres a partir de les 17:00 h. na Plaza La Escandalera y dende la Mocedá d'Izquierda Soberanista queremos tresmitir el nuesu apoyu a la iniciativa y anunciar la nuesa presencia a la mesma.
No hay comentarios:
Publicar un comentario