viernes, 11 de octubre de 2013

XORNADA POR UNA MOCEDÁ COMBATIVO Y CRÍTICO

La organización de Mocedá d'Izquierda Soberanista -Darréu- entama'l prósimu vienres 18 d'ochobre una xornada denomada “por una mocedá combativo y crítico” n'Uviéu. Con esta xornada dende Darréu queremos averar a la mocedá un mensaxe críticu y una actitú combativa p'afrontar la dura situación que vive'l Pueblu Asturianu anguaño. Les agresiones a Asturies, a nivel políticu, socioeconómicu o cultural son el día a día y la mocedá asturiano va ser la principal víctima de les polítiques capitalistes y españoles que traten d'hipotecar el nuesu futuru. Pero entá queda mocedá que nun se resigna y sigue lluchando pol futuru.

Asina, dende Darréu presentamos esta xornada a los mozos y les moces del país col envís de crear un espaciu formativu, reflexivu, críticu y d'averamientu pa sumar fuercies na llucha pola soberanía política y económica d'Asturies. Poro, llamamos a tola xente mozo a participar nesta xornada y facer d'esta un puntu d'alcuentru, concienciación y formación que amás faiga alcordanza de la Revolución d'ochobre de 1934.

La xornada entamará a les 18:30 hores de la man de Santi Fano, compañeru que mos averará una realidá pocu conocía y de la que la xente crítico nun ye consciente. Baxo'l títulu “Internet, redes sociales y control sociopolíticu” Santi Fano falaranos sobre la utilización que los poderes político-económicos faen de la rede y como controlen l'activismu y la vida privada de la xente al travíes de les redes sociales.

A les 20:30 hores Darréu dará un actu políticu en formatu “charra-alderique” entituláu “¿Paru o emigración? ¡Escoyemos Revolución”. Con esta intervención la organización quier espresar la so posición énte la situación de la mocedá asturiano y proponer alternatives pa iguar el futuru coleutivu d'Asturies. Finará la xornada a les 21:30 hores, onde cellebraremos un pinchéu con precios populares amenizáu con música'l país. Tolos actos de la xornada sedrán nos llocales de la Corriente Sindical d'Izquierda n'Uviéu, asitiaos na avenía Hermanos Menéndez Pidal, 14, baxu.

¡ACUDI Y ESPARDE! ¡POR UNA MOCEDÁ CRÍTICO Y COMBATIVO!

¡ASTURIES LLIBRE, PODER POPULAR!

No hay comentarios:

Publicar un comentario