Intervención de Darreu nel homenaxe a los Mártires de Carbayín

Bona tardi a toos y toes, dende Darréu queremos davos les gracies por asistir a esti actu.

Tamos en Carbayín, un añu más, cumpliendo yá’l terceru de la nuesa presencia equí nel mes de Payares. Queremos de nuevu, homenaxear a los Mártires de Carbayín y al restu d’asturianos y asturianes que perdieron la vida lluchando escontra'l xigante Facista, Capitalista y comu non, Españolista.

Mañana, Domingu 24 Payares, cúmplense 79 años de la masacre qu’asocedió en La Curuxona, onde enterráronse vives a 24 presones de Sama y Ciañu. Mutilaron los sos cuerpos, torturáronlos fasta qu’algamaron una muerte marcada pol dolor. Pero, ¿cuál foi’l delitu acometíu por esta xente torturada y asesinada? Dicimos con argullu que dengún, foron asesinaos por lluchar y comprometese escontra’l capitalismu ya’l facismu, pensando n’un futuru meyor p’Asturies. Poro, güei llamámoslos héroes, llamamoslos exemplu, por nun doblar la rodiella en dengún momentu y preferir sudar la última gota'l sangre lluchando fasta la muerte, que doblegase énte l’enemigu.

Güei ye 2013, nun ye 1934, pero l’Estáu Español sigui acometiendo atrocidaes escontra la clas trabayadora asturiana. El sistema capitalista, esplota y ayuda a esplotar, reprime y ayuda a reprimir y somorguia a les clases populares na miseria y la probitú, y nun vamos dicilos pero si daqué mos sobra, son exemplos sobro esto.

Tresmitimos dende Darréu a la mocedá asturiano les mesmes entregues que l’añu pasau, ¿ Por qué siguimos escoyendo capitalismu y España cuando namás signifiquen miseria y xabaz represión? ¿ Nun sedremos más llibres cuando optemos por desaniciar la esplotación capitalista y la opresión nacional?

Nós retrucamos-yos cola llucha, el compromisu y el trabayu por construyir una Asturies llibre, nós queremos otra Asturies. Animámosvos a caminar con nos na construición del país pol que toos y toes naguamos. Solu esiste un camín, el de la soberanía política y económica, el de una República Asturiana al serviciu de les y los trabayadores. Tenemos un exemplu nel que miranos, toos aquellos que morrieron faciendo hestoria, nun morrieron en vanu, nós garramos el relevu y nun mos rendimos por muncho que mos frayen. Nun mos amedrentamos por muncho que mos persigan y nun mos quedamos en casa porque queremos otra Asturies.

Munches gracies por venir.

¡Puxa Asturies Llibre y Socialista!