domingo, 24 de noviembre de 2013

La mocedá que nun escaez homenaxeó a los Mártires de Carbayín.

Esti pasáu sabadu 23 de payares la organización de Mocedá d'Izquierda Soberanista cellebró, por tercer añu consecutivu l'homenaxe a los Mártires de Carbayín. L'actu, qu'entamó a les 13:00 hores nel cimenteriu de Carbayin Alto foi un emotivu homenaxe a les 24 persones que foron torturaes y asesinaes pola Guardia Civil Española nel mes d'ochobre de 1934, dientru de la represión que'l gobiernu español de la II República empobinó escontra la clas trabayadora asturiana.

Decenes de persones acudieron al llamáu de Darréu y axuntáronse énte la fuesa común del cimenteriu d'esta llocalidá. Una vocera de Darréu dirixió unes pallabres d'alcordanza a estes persones y llamó a la mocedá a siguir la llucha por otra Asturies, onde seya'l Pueblu Asturianu quien marque'l destín del país, la política y la economía. Llamose a dignificar la memoria de tolos nuesos compatriotes que sofrieron les agresiones del capitalismu y el facismu y tamién llamose a la mocedá asturiano a participar nel procesu de reconstrución social y nacional que tien de garantizar el futuru d'Asturies y la so xente.

Dende Darréu queremos agradecer la presencia del Coordinador Nacional de Conceyu Abiertu, que foi convidáu al actu y tamién intervino nel mesmu, llamando a recuperar la dignidá de toles víctimes del facismu y denunció el falsu procesu de "transición democrática". Acabó l'actu cola interpretación cola gaita del himnu soberanista "La Flor del Agua" de la man d'un compañeru.

Dende Darréu queremos tresmitir el nuesu determín de caltener viva la memoria d'esa Asturies que nun se rinde y que llucha por da-y una solución soberana y coleutiva a los problemes de los y les trabayadores. Tamién queremos agradecer enforma la presencia de toles persones que s'averaron a Carbayín y la presencia de vecinos de la llocalidá sierense, munchos d'ellos bien mozos.

¡Puxa los Mártires de Carbayín!
¡Asturies nun escaez!

No hay comentarios:

Publicar un comentario