Fai 96 años en Rusia entamó una esperiencia social que cambió enforma la forma de ver la política en tol mundo y tamien y contribuyó d'una forma cimera al desendolcu de la llucha de clases. Depués de cuasi un sieglu munchos mozos siguimos mirando p'aquella Gran Revolución Socialista d'Ochobre almirando aquella esperiencia tresformadora y revolucionaria ensín precedentes y deprendiendo de la mesma en bas a los principios de crítica y autocrítica.
Aquel momentu yera de crisis del sistema capitalista y taba n'auxe el belicismu imperialista europeu, hasta'l puntu que les propios estaos imperialistes taben en guerra ente ellos, condergando a millones de persones a morrer al serviciu del capital. El proletariáu rusu cansó de la situación y xunta los campesinos y la direición del Partíu Bolchevique tomó a la fin el control de les sos vides. La direición de Lenin y tol partíu revolucionariu, la organización y cooperación de los "soviets" y el determín de bona parte del Pueblu propició una victoria ensín comparanza pa los esplotaos y les esplotaes.
Güei, na Asturies de 2013, sofriendo la crisis capitalista qu'enxamás mos dexará como vemos na hestoria si nun superamos el sistema, el socialismu más qu'una opción ye una necesida. Dende la Mocedá d'Izquierda Soberanista d'Asturies siguimos convencíos de que la única alternativa al sistema capitalista ye'l socialismu, poro, el Pueblu Trabayador tien de tomar el poder políticu y económicu y tien de desendolar una Revolución Socialista con tolo qu'esto sinifica.
Amás l'apueste de Darréu pol socialismu nun dexa de llau la nuesa llucha polos drechos nacionales d'Asturies. Caltenemos que la lliberacion nacional d'Asturies y otros pueblos partiendo d'una perspeutiva capitalista o reformadora d'esti sistema ye una contradición dafechu. Dientru'l capitalismu los pueblos enxamás sedrán soberanos, anque algamen constituyir un Estáu propiu, pues les relaciones económiques siguirán siendo de dominación social, entendiendo que sedrán en verdá les potencies imperialistes les que controlen la económia y la política d'estos países al travíes de les grandes empreses o monopolios.
Asina, Darreu fai alcordanza de la Revolución Bolchevique pol so valir hestóricu dientru'l marcu de la llucha de clases. Camentamos que la esperiencia soviética tien de facer ver a los oprimíos que les revoluciones pueden facese y nun son un conceptu vacíu enllenu de romanticismu. Eso ye lo que tenemos que facer anguaño, apostar pola Revolución n'Asturies. Pero pa ello la mocedá asturiano tien de tener clara una de les grandes leiciones de Lenin "la revolución nun se fai, s'organiza".
¡ALANTRE LA LLUCHA DE LA CLAS OBRERA!
¡N'ALCORDANZA DE LA REVOLUCIÓN BOLCHEVIQUE DE 1917!
¡PUXA ASTURIES LLIBRE Y SOCIALISTA!
No hay comentarios:
Publicar un comentario