Avérase un añu más
la fecha na que dende les distintes estayes del poder se “cellebra” un nuevu
aniversariu de l’aprobación de la constitución española de 1978, y dende la
mocedá d’izquierda soberanista, otru añu más, nun podemos más que refugala y
desixir un marcu que dote de verdadera democracia a Asturies y el restu de
pueblos que componen l’estáu español.
Ye bien conocío por
toos y toes la situación na que s’atopa Asturies nestos 35 años de supuesta
democracia: paru, emigración, desindustrialización, desaniciu de los seutores
económicos tradicionales asturianos, crisis demográfica y social, falta de
democracia, y nel planu puramente xoven, una situación que podemos resumir nuna
frase bien curtia: nun tenemos futuru.
La Constitución
Española diz nel so preámbulu que busca “asegurar a toos una digna calidá de
vida”, mientres n’Asturies d’anguaño un 17% de la población vive perbaxo l’umbral
de la probitú. Nel so artículu 27, afita que “los poderes públicos garanticen
el drechu de toos a la educación”, mientres cientos de mozos y moces tan privaos
d’estudiar por nun poder acceder a beques, nun poder pagar les matrícules, o
tener que devolver ayudes otorgaes anteriormente.
Tamién diz el testu
constitucional español que toos tenemos drechu “a esfrutar d’una vivienda digna
y afayaíza”, pero los mozos y moces asturianes nun pueden acceder a más
vivienda que la de los pás, ente otres razones, porque pesie a que la
constitución diz que toos y toes tenemos “drechu al trabayu”, más del 60% de la
xuventú asturiana ta desemplegada, o nunes condiciones llaborales precaries que nun permiten
acceder a un mercáu inmobiliariu privatizáu dafechu.
De la mesma forma,
la Constitución manifiesta que somos iguales ante la llei, “ensin que pueda prevalecer discriminación dala
por razón de nacimientu, raza, sexu, relixón, opinión o cualquier otra
condición o circunstancia personal o social”. Sicasí,
los asturianos y asturianes sufren discriminación por falar les llingües
propies del nuesu país.
Son
dalgunos exemplos concretos de la farsa constitucional, de que nun se cumple
más que lo que ye d’interés pa les élites económiques y polítiques españoles, y
de los sos representantes n’instituciones llocales y autonómiques. Esto ye
debío a que’l testu constitucional español ye la continuación del orde
socioeconómicu vixente nel estáu dende va munches décades, el mesmu que
reprimió a sangre y fueu a los obreros asturianos nel 34 o na Guerra Civil, y
que cola etapa franquista amosó hasta ónde ye capaz de llegar con tal de
caltener los sos privilexos.
La
Constitución ye antidemocrática, porque ampara y da continuidá al orde viniente
del franquismu, porque permite que se violen drechos básicos, incluyíos na
Carta de los Drechos humanos. Tamién porque ampara que n’Asturies d’anguaño la
mocedá se vea obligada a emigrar, a tar nes llistes del paru, trabayando na
precariedá, o ensin posibilidá económica d’estudiar.
Ye
antidemocrática porque nun reconoz los drechos de los pueblos que componen l’estáu,
y ñega’l drechu d’autodetermín mediante la “indivisibilidá” de la “nación
española”, llexitimando al exércitu p’actuar escontra cualquier procesu de
voluntá popular. Nesi sen, una constitución que permite l’ “apartheid” llegal
de toa una comunidá de falantes d’una llingua, xamás puede nin podrá ser
democrática.
Poro,
queda amosao que sobren los motivos pa refugar la Constitución Española, y
dende Darréu nun queremos dexar de manifestar que nun ye más que’l marcu llegal
nel que se mueve la burguesía nel estáu español. “Quien fae la llei, fae la
trampa”, y nesti casu quien fae la llei nun ye más que los banqueros, grandes
empresarios, y demás componentes del poder económicu, tanto estatal o
supraestatal, anguaño cola conocía “troika” en representación de la oligarquía
europea.
Ye
por ello que dende la mocedá d’izquierda soberanista creyemos imprescindible
frayar con esti marcu, emancipanos política, económica, y socialmente. Algamar
la igualdá social, mediante’l control obreru d’una Asturies soberana, empobináu
al traviés de la so emancipación política y económica nun sistema socialista, ye’l
camín que consideramos imprescindible dende Darréu, y la única salida real que
dea un futuru a la mocedá, que mos permita disfrutar na práutica del drechu al
trabayu, a la vivienda,a la educación, a la non discriminación… A un futuru
dignu p’Asturies y n’Asturies.
No hay comentarios:
Publicar un comentario