viernes, 6 de diciembre de 2013

Les organizaciones xuveniles de los pueblos oprimíos xuntes contra'l Réxime español y capitalista

Na mañana d'esti seis d'avientu, Día de la Constitución Española, impuesta a la mocedá trabayadora, les organizaciones independentistes y soberanistes de los estremaos pueblos oprimíos del Estáu Español venimos de dar una rueda de prensa conxunta y roblar un manifiestu xunitariu na Plaza d'Oriente de Madrid. L'envís d'esta aición nun ye otru qu'anunciar que dende les estremaes nacionalidaes del Estáu tomamos el determín d'acabar, col internacionalismu como fuercia, col nuesu enemigu común, el réxime españolista y burgués representáu nel Reinu d'España.

Poro, anunciamos dende les organizaciones que roblen esti manifiestu xunitariu que'l soberanismu, el socialismu y el feminismu s'afiten como los nuesos pegoyos cimeros pa derrocar al réxime qu'oprime a los nuesos pueblos. Poro, dende Darréu y el restu d'organizaciones xuveniles collacies anunciamos que somos la vuestra velea.

MANIFIESTU XUNITARIU:

Demientres décades vinimos arrecostinando los principales vicios del Réxime franquista, qu'enxamás nun cansemos de denunciarr: la continuidá de la política económica, de les instituciones reciclaes, de la España indivisible,del patriarcáu más xabaz, de la vergoñosa represión política… La llamada ‘Transición’ nun foi sinón una Transacción de Poderes na que la plácida socesión na Xefatura del Estáu, del dictador al campechanu, ye la so cimera espresión. La izquierda reformista, que s'incorporó a esti procesu claudicando y abandonando práuticamente toles demandes de la oposición popular al franquismu, foi fundamental pal ésitu del procesu. La rotura democrática nel Estáu español quedaba y entá queda pendiente.

Agora, cuando se cumplen 35 años de la Constitución Española del ’78, anovamos la nuesa voluntá de tomar les riendes del nuesu destín nun contestu en que'l derechu a decidir (indistintamente de la so posible aplicación sobre los nuesos pueblos, sobre los nuesos cuerpos, sobre la forma del Estáu, sobre'l modelu económicu, sobre l'usu del espaciu y l'entornu, etc.) ye permanentemente frayáu. Esta fecha tan simbólica, arguyu del Réxime que consigue imponer n'un clima de mieu y tutela del Exércitu les sos riegles del xuegu, ye la qu'escoyimos les distintes organizaciones de los pueblos p'anunciar la nuesa confluencia estratéxica, siempres dende'l respetu y reconocencia a les dinámiques que marquen el trabayu en cada territoriu, y por tanto, a la soberanía de toes elles.

La situación de la mocedá nos nuesos pueblos ye dafechamente crítica: precariedá llaboral, desempléu, esiliu, elitización del sistema educativu, empobrecimiento, mercantilización de los llugares y actividaes d'ociu, etc. Amás, p'aquella mocedá consecuente y combativo tenemos qu'amesta otros fautores tales como la permanente criminalización y represión a la que nos somete'l Réxime por desenvolver les nueses actividaes de llucha militante. Tou esti panorama, sicasí, nun nos fai cayer nel desaliendu, sinón que nos emburria a doblar esfuercios na construcción de les alternatives esistentes, tanxibles y series.

Frenti al so capitalismu devorador, frenti al so patrioterismu españolizador y frente al patriarcáu, la mocedá allegre y combativo apueste firmemente pol drechu d'autodetermín, pol feminismu y pol socialismu.La cuestión de xéneru, la de clase y la nacional son los nuesos trés pegoyos de llucha prioritarios. Los nuesos movimientos nun esisten pa pedimiar migayes, ñacen pa vencer y pa conquistar el futuru por aciu la constancia, la consecuencia y la fortaleza ideolóxica que nos caracteriza.

Dende les organizaciones xuveniles de los pueblos so xurisdicción del estáu español, queremos faer pública nuesa firme decisión d'avanzar per esti camín d'ilusión y esperanza.Y especialmente, de faelo col
internacionalismu por bandera, sabiendo que la deconstrucción de tol entramáu institucional del Réxime, de la economía criminal y de les mentalidaes obsoletas tien que ser una xera compartía por toes y tolos que creemos na xusticia social.

En Madrid, a 6 d'Avientu de 2013

Roblen:

ARRAN (Paisos Cataláns), Azarug (Canarias), BRIGA (Galiza), DARRÉU (Asturies), ERNAI (Euskal Herria), ISCA! (Galiza), JALEO!!! (Andaluzia), PURNA (Aragón), YESCA (Castilla)

No hay comentarios:

Publicar un comentario