Darréu unvía la so solidaridá al barriu obreru burgalés de Gamonal

La Mocedá Soberanista Revolucionario d'Asturies quier unviar un abrazu de fuercia y solidaridá al Pueblu Trabayador de Castiella y en concretu a la xente del barriu de Gamonal, en Burgos, que lleven dellos años lluchando a la escontra d'operación especulativa, un bulevar comercial qu'afeuta negativamente a los pequeños comercios de la zona y da-y prioridá al beneficiu de delles grandes empreses. Los vecinos refuguen el proyeutu dende hai dos años, entendiendo qu'esta operación, empobinada pol Ayuntamientu de Burgos y les empreses que van de la so man nun-yos interesa y creen que'l gasto públicu de les mesmes podría cubrir necesidaes sociales del barriu, onde'l paru algama cifres llacerioses.

Gamonal lleva dos años lluchando escontra esta operación ensín que los políticos de turno, al serviciu del capital especulativu, atendieran a razones y al consensu del barriu a la hora de dicir NON a esti proyeutu. Hai unos díes la llucha entamó a ser más conflictiva, gracies a la represión exercía pola policía española escontra una manifestación pacífica. El pueblu fartu de que nun se-y escuche y reprima entamó a exercer una llucha violenta escontra les propies fuercies represives y sucursales bancaries, y como non escontra'l material que les empreses que quieren executar la obra tien llantáu nel barriu.

Ayeri l'alcalde de Burgos anunciaba que pel momentu s'aparen les obres y que diben mirase otres posibilidaes. Depués de díes de batalla y llucha los vecinos algamaron una pequeña victoria y s'atendió de forma parcial a los sos pidimientos. Decenes y decenes de deteníos y xente na cárcele ye'l balance d'una llucha que dende Asturies debemos saludar y aplaudir como'l camín pa dir faciendo camín escontra'l capitalismu y el so representante que ye'l Reinu d'España.

Poro, dende Darréu unviamos la nuesa solidaridá internacionalista al pueblu obreru de Gamonal y queremos denunciar la criminalización activa qu'exercieron los grandes medios de comunicación y políticos d'estremaos partios, como ye'l casu d'IU. Saludamos la llucha de Gamonal y tamién a los nuesos compañeros de Yesca, que foron un de los coleutivos más criminalizacios polos medios de comunicación. La so difamación entama a nun tener nenguna credibilidá social y la clas obrera entama a güeyar el camín.

¡Asturies con Gamonal! ¡Puxa la llucha de la clas obrera!