¡Cualloto nun se pieslla!

Más de mil persones marcharon dende Cualloto a Uviéu esti pasáu sábado 8 de febrero en defensa de los puestos de trabayu y la propia planta de Coca Cola n'Asturies. Trabayadores, familiares y persones solidaries foron un clamor en defensa de la viabilidá de Coca Cola n'Asturies y l'emplegu nel nuesu país. La marcha acabó sobre les 13:30 hores delantre la Xunta Xeneral onde dalgunos políticos oportunistes foron a facer la semeya colos trabayadores pesie a la pasividá que tan teniendo con esti conflicto llaboral.

Dende Darréu, la mocedá d'izquierda soberanista tuvimos asperando a los trabayadores n'Uviéu, onde aprovechamos la nuesa presencia militante pa siguir espardiendo la idega de boicot a Coca Cola como midía de presión y castigu a esta empresa si finalmente nun cede na so avaricia y falta de razón. Cientes de persones recibieron nos momentos previos a la llegada de los trabayadores octavilles con un testu claro onde llamamos a nun beber productos d'esta empresa como midía de presión pa iguar esti conflicto.

Tamién queremos dende Darréu agredecer el sofitu que munches persones amosaron a la nuesa campaña de boicot, animándonos a siguir cola mesma o mesmamente pidiéndonos material pa colaborar de manera activa nel boicot a la firma yanqui. Siguiremos afondando na mesma y aportando'l nuesu granín de sable pa sofitar a los y les trabayadores de Cualloto y defender el trabayu n'Asturies, qu'a fin de cuentes ye defender el futuru de nueso.

¡Cualloto nun se pieslla! ¡Si n'Asturies nun se fai, n'Asturies nun se consume!