lunes, 17 de febrero de 2014

Darréu visitó a los trabayadores de Coca Cola nel primer día de fuelga indefinía

Militantes de Darréu, la Mocedá d'Izquierda Soberanista visitaron na tardi del 17 de febreru a los trabayadores de Coca Cola, qu'entamaron una fuelga indefinía esti día pa refugar los planes de la empresa de desmantelar delles plantes en tol estau, dexando a miles de persones na cai.

Ellí ufrimos la nuesa solidaridá y ayuda a los trabayadores, los cuales acoyeron con muncho enfotu la nuesa campaña de presión de boicot activu a la multinacional norteamericana. Entrugamos pola situación real del procesu y sobre l'ésitu de la convocatoria de fuelga indefinía.

Los trabayadores agradecieron la nuesa presencia y cincaron en tresmitinos el vergoñosu papel que tan exerciendo los medios de comunicación a la hora d'informar sobre esti conflictu. Paez ser que les cifres que la opinión pública manexa nun son reales y la situación de númberos de despíos en tol Estáu Español ye ainda más grave de lo que paez.

Dende Darréu queremos tresmitir a los trabayadores de Cualloto la nuesa solidaridá y saludamos la convocatoria de fuelga indefinía. La llucha, la resistencia y la unidá obrera munches vegaes faen que s'algamen pequeñes victories como supimos güei col casu de la empresa Tenneco.

¡Non al desmantelamientu de Cualloto! ¡Nun bebas Coca Cola! ¡Nin un pasu atrás!

No hay comentarios:

Publicar un comentario