Tenneco: cuando resistir ye vencer.

El Tribunal Superior de Xusticia d’Asturies (TSXA) estimó nel so fallu la demanda de CSI, CCOO, UGT y USO frente a les empreses Tenneco Automotive Ibérica S.A. (Taisa) y Tenneco Innovación S.L. (Tisl), declarando nulu el despidu colectivu comunicáu el 14 d’ochobre de 2013. La sentencia declara’l derechu de los trabayadores a la reincorporación al trabayu, condergando a les empreses a la realmisión darréu con pagu de los salarios non percibíos. Contra la sentencia del TSXA cabe recursu de Casación énte la Sala Cuarta del Tribunal Supremu español, nos cinco díes siguientes a la notificación. Ye la segunda victoria xudicial de los trabayadores depués de consiguir midíes pa que la empresa nun se llevara la maquinaría de la fábrica de Xixón.

Dende Darréu queremos unviar un saludu a la plantiya de Tenneco y felicitar a trabayadores y solidarios pola llucha desendolcada tol tiempu que’l conflictu duró. L’apuestu por una unidá obrera real tomando a l’asamblea como bas de tol movimientu paez que ta dando resultaos a los trabayadores de Tenneco y ye exemplar la llucha caltenía por esta asamblea pola continuidá de la producción en Xixón y el futuru llaboral asturianu. Y ye que namái pudimos ver a la xente de Tenneco nel so frenti, sinon que tuvieron en milenta batalles exerciendo solidaridá activa. El frenti d’unidá obrera entamáu nel nuesu país pola xente de Tenneco y otres empreses ye otra amuesa de lo que se puede facer creyendo na fuercia del Pueblu Trabayador Asturiana. La llarga y dura llucha da resultaos, resistir ye vencer.

Asina pues, felicitamos a la plantiya de Tenneco Xixón y llamamos a la mocedá asturiano a deprender d’esta esperiencia, estrayendo conclusiones d’esti conflictu llaboral, que nun ye otra cosa qu’un episodiu más de lo que ye la llucha de clases. Con organización, unidá, solidaridá y firmeza la clas trabayadora pue algamar lo qu’ella quiera y la mocedá asturiano tamién. Algamemos otra Asturies, tenemos munchos exemplos de los que deprender y los trabayadores de Monroe son un d’ellos. 

¡Puxa la llucha de la clas obrera! ¡Resistir ye vencer! ¡Puxa Asturies llibre!