Darréu participó na manifestación de les Asamblees de Trabayadores en Llucha

Na tarde del xueves 20 de marzu Xixón acoyó una manifestación entamada poles Asamblees de Trabayadores en Llucha, con entamu na Plaza L’Humedal y llegada na Plaza l’Ayuntamientu. Na mesma participaron dellos miles de persones, cola presencia de numberosos coleutivos asturianos de toa triba. Al entamu de la mesma, los trabayadores en llucha colocaron una barricada de neumáticos amburando, como bona amuesa d’un ambiente combativu con glayíos como “Asturies sálvase lluchando”.

Darréu sofitó activamente la convocatoria con un baberu baxo’l llema “Con soberanía la mocedá tien futuru”, amás del repartu de pasquinos desplicativos. Dende la Mocedá d’Izquierda Soberanista entendemos qu’estes movilizaciones sirven non namái pa defender los puestos de trabayu de los actuales trabayadores, sinon pa defender el futuru de la mocedá del nuesu país, condergada al paru, la precariedá o la emigración.

Nesi sentíu, quiximos poner l’enfotu na necesidá d’afondar nel camín de la soberanía pa tol pueblu asturianu, siendo entá mayor si cabe dicha necesidá pa los mozos y les moces, pa construyir un futuru dignu n’Asturies nel que nun se mos pongan torgues pa estudiar, trabayar, o acceder a una vivienda digno.

Ye amás perimportante siguir y afondar en dinámiques de llucha como la prauticada poles Asamblees de Trabayadores, qu’espeya perbien la necesidá d’un marcu de llucha propiu p’Asturies, como nación coles sos condiciones y dinámiques específiques. Poro, valoramos perpositivamente esta movilización, y encamentamos a la mocedá a siguir cola llucha pol so futuru, pel camín de la soberanía, el socialismu, el feminismu, y en definitiva la fin de toa forma d’opresión.