Esti xueves 20 de marzu a les 19:00 na Plaza L’Humedal (Xixón) tendrá
salida una manifestación entamada poles Asamblees de Trabayadores en
Llucha, iniciativa xunitaria na que s’atopen coleutivos d’obreros y
obreres d’empreses como Caxastur, Tenneco, Fundición Nodular,
Subcontrates d’HUNOSA, SEDES, Coca-Cola, afeutaos pol mercuriu d’AZSA, u Hotel León ente otres.
Dende Darréu valoramos perpositivamente esti procesu de frente
xunitariu pa los conflictos obreros n’Asturies, como ferramienta que
puede sirvir pa finar d’una vegada cola seutorialización de les lluches
obreres que venimos viviendo toos estos años. Amás d’ello, apuesta por
un modelu que desborda les estructures de los sindicatos institucionales
(CCOO, UGT, USO) y da la voz, el votu, y el verdaderu poder a los
propios trabayadores, aspeutu pernecesariu pa orientar les lluches haza
una perspeutiva combativa tapecida y tarazada anteriormente poles
fuercies pseudosindicales enantes citaes.
A ello hai qu’amestar
otru fechu pervaloratible, como ye la conformación d’esti frente de
llucha dende un marcu específicu asturianu, una espresión práutica
d’Asturies como marcu nacional de llucha de clases a siguir
desendolcando y potenciando. El camín ye organizanos como clase nel
nuesu país, pa defender non namái un presente dignu pa tol Pueblu
Trabayador Asturianu, sinon tamién un futuru nel que la mocedá del nuesu
país pueda vivir, trabayar, y desarrollase n’Asturies, cuestiones de
les qu’anguaño se nos priva.
Ye por ello que facemos un
llamamientu a la mocedá de Xixón y el restu d’Asturies a sofitar esta
movilización, reclamando trabayu y futuru, pal nuesu país y nel nuesu
país.
No hay comentarios:
Publicar un comentario