Nel 8 de Marzu pola fin del patriarcáu

La organización de mocedá soberanísta y revolucionario Darréu, entiende’l Día la Muyer Trabayadora, 8 de Marzu, comu un día de reivindicación y llucha pola búsqueda d’una vida coleutiva significativa falando en términos de dignidá y xusticia. Esto supón abandonar la idega de mercantilización del ser humanu, vistu comu instrumentu de enriquecimientu productivu y económicu que nun revierte enxamás en un beneficiu paralelu de la calidá de vida de los susodichos humanos que trabayen por ello. Esti xigante monstruosu nomáu capitalismu, azota la espalda de les muyeres con triple cuerda, ye dicir, ésta sofre les esplotaciones nel trabayu, les discriminaciones comu asturiana y amás sofre les innumberables consecuencies d’un sistema machista y patriarcal. 

Nun se puen entender estes pallabres comu que Darréu llucha pola emancipación ya l’empoderamientu la muyer namai nesti intre, un día al añu, si non que ye cuestión fundamental nel trabayu organizativu, teóricu y de cai diariu. Asina, paez que la muyer tien de duplicar y triplicar l’esfuerciu nel trabayu pola emancipación de la clas trabayadora y por lliberase del xugu machista. Ensín embargu, nos nun lo vemos asina, nun tien de ser un doble esfuerciu de un sesu y/o xéneru, sinon un esfuerciu coleutivu de la propia clas trabayadora pa frayar les cadenes que mos torguen pa construyir la nación pola que naguamos. Una Asturies llibre y socialista. 

Ficiéronmos creyer que col drechu a votu o l’accesu a un trabayu, por ciertu drechos algamaos n’una llarga llucha que entama na primer década del sieglu pasáu, tenemos conquistáu too aquello qu’atañe a les muyeres, y que tolo demás que podamos pidir, tien de quedar relegáu a “Ruíu”. Y nun ye asina, nun puede ser asina, hai dellos drechos por conquistar entá, comu muyeres y comu trabayadores que tamién somos. Nun mos sirve una riestra de reformes dende “l’Estáu del maltar”, sírvome del exemplu de la Llei de paridá ente munchos otros engañabobos, necesitamos una tresformación política, económica y social que que faiga a la muyer poder desendolcase como tal y desaniciu a la fin el réxime patriarcal. 


Nun podemos dexar de llau, por ser un de los mayores atentáos escontra’l bientar, l’autoestima, la capacidá d’eleición y la capacidá de control y planificación de la propia vida les muyeres, la reforma l’albuertu empobinada dicen por Gallardón. Esti últimu, nun ye más qu’otru exemplu del frutu de concebir el papel de la muyer en sociedá baxo modelos arcaicos y caducos, frutu d’una educación machista n’un sistema educativu deficitariu y frutu de un sistema capitalista qu’afita la desigualdá nel xacíu más ampliu de la propia espresión. 

Dende Darréu queremos tresmitir un mensaxe qu’implica llucha constante, un mensaxe qu’implica ver los “rellatos de vida” de les muyeres, de les trabayadores y de les asturianes comu la realidá humana qu’empobine la tresformación del sistema haza’l nuesu proyeutu de capacitar a la muyer nos ámbitos económicu, políticu y social. Y en consecuencia, la tresformación de les mentalidaes coleutives, la tresformación de la educación y la tresformación social, pa llibres de prexuicios, discriminaciones y desigualdaes, lluchar pola Asturies que naguamos. Convidamos un añu más, a facer caún, un exerciciu de autocrítica, de reflexón y d’estratexa de cambeu, pa facer d’esta rialidá na que vivimos, una xusta, digna ya igualitaria.