martes, 4 de marzo de 2014

Una fola de dignidá roxa llegó a La Pola Siero

Na mañana del 4 de marzu cientos de persones llegaron andando dende Cualloto desixiendo una solución xusta y digna pa la situación de la planta de Coca Cola en Cualloto. Los trabayadores y persones solidaries salieron a les 9:30 hores de la fábrica de Cualloto y llegaron sobre les 12:30 a la llocalidá sierense de La Pola Siero.

Los compañeros recibieron la solidaridá de cientos de polesos y reclamaron nuevamente los puestos de trabayu, una solución digna onde l'emplegu nun se vea afeutáu, yá que ye una empresa con beneficios multimillonarios nel Estáu Español y esos beneficios son xeneraos pola fuercia de trabayu d'estes persones.

Dende Darréu quinximos nuevamente amosar la nuesa solidaridá colos trabayadores d'esta empresa y dellos militantes tuvimos en La Pola de Siero recibiendo a los trabayadores. Entendemos que yá ta bien de poner la codicia d'unos pocos perriba l'interés xeneral de la xente. Dende Darréu siguimos trabayando na nuesa campña de boicot a la multinacional yanki.

Lo contradictoriu y xabaz del conflictu de Coca Cola ye una espresión miserable más de lo que ye esti sistema capitalista, afitáu nel réxime español de 1978. Creemos que'l nuesu futuru nun se compra, sinon que s'algama con unidá, organización y muncha llucha y esi futuru pasa pola construcción d'una Asturies con drechu a decidir y escoyer sobre tolo que cinque a los intereses coleutivos del Pueblu. 

¡Cualloto nun se vende! 
¡Asturies sálvase lluchando!

#NunBebasCocaCola

No hay comentarios:

Publicar un comentario