Presentes na mani d'aniciu de les marches de la dignidá.

Esti pasáu sábadu 1 de marzu la organización de mocedá de la izquierda soberanista asturiana, Darréu, formó parte de la manifestación d'aniciu de les marches del 22M, un movimientu social que pretende axuntar fuercies y voluntaes en pro d'un cambeu social. Dende Asturies salieron esti 1 de marzu decenes de persones camín de Madrí, col envís d'aportar a la ciudá'l 22 de marzu, onde habrá una movilización.

La manifestación, que partió col llema xeneral "emburriando un cambeu social" cunto con bona presencia de xente y percorrió la distancia qu'hai ente La Felguera y Sama con una climatoloxía que nun acompañó precisamente. Pela nuesa parte, militantes de Darréu participamos na mesma con un baberu propiu col llema "Soberanía, la llave'l nuesu futuru" y cola presencia d'asturines.

Anque Darréu nun comparta dalgunes cuestiones de la movilización entendemos que recueye unos mínimos democráticos y sociales que podemos asumir y por ello participemos nesta manifestación. Amás entendemos que l'envís de la mocedá d'izquierda soberanista ye tar delláu de la xente nes cais del país, averando a ellos el nuesu proyeutu de reconstrucción social y nacional p'Asturies.

Asina, valoramos de forma positiva la presencia de la mocedá d'izquierda soberanista nesta movilización, onde tuvimos presentando como alternativa a la pergrave situación coleutiva que vivimos la soberanía política y económica. Entendemos qu'esti ye'l camín si queremos algamar una Asturies meyor y un futuru dignu y nun vamos cansar de trabayar nesti sen.

¡Puxa la mocedá que llucha! ¡Soberanía política y económica p'Asturies!