Escontra'l desemplegu, el camín de la soberanía

Los nuevos datos del desempléu traen otra vegada males noticies pa la mocedá d’Asturies. Según los datos apurríos pol gobiernu español, sigue medrando’l paru pa los mozos y moces del nuesu país, incluso perriba la media xeneral.

Nel coleutivu de menores de 25 años, medró’l paru en 130 persones, más d’un 1,5% qu’asitia’l total en 8.020 mozos y moces menores de 25 años rexistraos nes llistes del paru. A estes cifres nun habría qu’escaecer amestar la mocedá que busca’l so futuru fuera d’Asturies mediante la emigración forciada, invisible nestos datos pero bien presente como una de les principales problemátiques n’Asturies.

D’otru lláu, ye de señalar que’l coleutivu de persones ensin empléu anterior –mozos y moces na so inmensa mayoría-  algama en marzu 8.351 persones, 303 más que nel mes de febreru y 479 más qu’en marzu del añu anterior. Sigue polo tanto medrando’l númberu de mozos y moces que, una vegada s’incorporen al tarren llaboral n’Asturies, nun consiguen acceder a un puestu de trabayu. 

Pero nun ye namái’l desempléu la única problemática que sufrimos la mocedá: la temporalidá algama cifres superiores al 90% nos nuevos contratos realizaos, y la precariedá ye una constante pa los mozos y moces que consiguen un trabayu. Paru, precariedá, y emigración: son les opciones que mos dan.

Ante estes y el restu d’agresiones –retayos na educación, represión de les lluches, etc- que sufre la mocedá asturiano, dende Darréu camentamos imprescindible organizase y lluchar pola tresformación d’una murnia realidá que yá dura décades nel nuesu país pa una xuventú a la que nun mos ufierten nengún futuru.

Nesti sistema capitalista nun hai futuru pa una clase obrera cada vegada más esplotada y con menos drechos. 

Nesti sistema patriarcal les muyeres vense condergaes a una opresión adicional, la de xéneru, que traduzse ente otres coses nes sos mayores cifres de desemplegu.

Nesti Estáu español, ferramienta capitalista que mos impón un sistema económicu asesín y  un marcu de rellaciones llaborales regresivu dafechu pa la clase obrera asturiana, nun hai salida p’Asturies. 

Ye por ello que siguimos apostando con enfotu pola soberanía, el socialismu, y el feminismu, como l´únicu camín p'algamar un trabayu y un futuru dignu pa la mocedá.