Feries d'Abril n'Asturies: Instrumentu españolista

La organización de mocedá d'izquierda soberanista Darréu quier denunciar un añu más el puxu y promoción de les Feries d’Abril nel nuesu país. Mientres el so númberu paez dir n’aumentu, y al so par el sofitu institucional a les mesmes, güeyamos tamién cómo les espresiones culturales asturianes van desaniciándose gracies a la omisión –o direutamente l’aición a la escontra- por parte de los conceyos o del propiu gobiernu asturianu.

Asina, queremos señalar que’l nuesu refugu a estos eventos nun tien la so motivación en que seya “dalgo foriato” en sí, sinon nel so emplegu como instrumentu d’aculturización nel nuesu país. Nesi sen, consideramos que ye un insultu tamién pa la cultura andaluza el so emplegu como arma arroxadiza pal beneficiu del principal interesáu en siguir col colonialismu cultural pa la construcción d’un Estáu uniforme: la burguesía española. Poro, ye tamién el nuesu deber como internacionalistes denunciar esta utilización d’espresiones culturales del país andaluz a la escontra de la identidá y diversidá de los pueblos.

El presupuestu públicu destináu a puxar pola cultura o les llingües propies del país, siempres bien probetayu, baxa más entá y constantemente nos últimos años cola escusa de la crisis del sistema capitalista, que sirve como cortina de fumu pa intensificar los ataques escontra la identidá asturiana.  A ello hai qu’amestar otros fechos como la so constante marxinación en medios de comunicación públicos y privaos, asina como nel sistema educativu, texendo con too ello el discursu hexemónicu del españolismu aculturizador na nuesa nación, que sirve pa normalizar munchos de los ataques escontra lo nueso.

Poro, camentamos imprescindible poner fin al emplegu de dineru públicu nesti tipu d’actos. Nun ye almisible que les alministraciones públiques del nuesu país marafundien perres n’eventos aculturizadores, mientres les nueses señes culturales muerren un pocu cada día. Por too ello, la mocedá d’izquierda soberanista siguiremos denunciando cualquier instrumentu aculturizador, y manifestando la necesidá de defender la nuesa identidá nacional de los ataques promovíos dende les élites socioeconómiques del Estáu español y executaos poles sos sucursales polítiques.