Aición escontra la Feria d'Abril en L'Infiestu

Militantes de la mocedá d’izquierda soberanista desendolcaron esti 1 Mayu en L’Infiestu delles aiciones de propaganda y concienciación coincidiendo cola cellebración de la Feria d’Abril nel conceyu, eventu promovíu pol Ayuntamientu y que dende Darréu entendemos como un elementu aculturizador más surdíu dende les instituciones. 

Repartiéronse pasquinos billingües pela zona la feria, apegando otru garrapiellu per distintos puntos de L’Infiestu. Nellos la mocedá soberanista afondaba en señalar la Feria d’Abril en Piloña como un emplegu más de la cultura andaluza como arma aculturizadora escontra la identidá y cultura d’Asturies, espeyando tamien la necesidá de puxar por eventos que respeten y caltengan la identidá propia del nuesu país.

Delles pancartes, cartelos y otres aiciones dan tamien visibilidá a una reivindicación pola que Darréu siguirá trabayando, combinando l’enfotu pola defensa de les nueses señes identitaries al tiempu que pidimos respetu, como bien esixe l’internacionalismu, pa les cultures d’otros países que son emplegaes como arma arroxadiza poles élites polítiques y económiques.