Un Primeru de Mayu lluchando pola soberanía y el socialismu.

Darréu - Organización de Mocedá d'Izquierda Soberanista - decidió salir a cai esti Primeru de Mayu en Xixón col sindicalismu de clas entendiendo qu'esta convocatoria de CSI, SUATEA y CGT yera la más llóxica y coherente pa los asturianos de conciencia. De la mesma manera Darréu decidió axuntase y sofitar el bloque xunitariu de la izquierda soberanista que baxo'l llema "Lluchando pola soberanía" pidió "techu, tierra, trabayu, pan, salú, educación, independencia, llibertá, xusticia y paz".

Militantes de Darréu tuvimos presentes reafirmando'l nuesu compromisu dende la mocedá pa col sindicalismu de clas pero tamien cola unidá d'aición na izquierda nacional asturiana. D'esta manera, portando asturines, banderes socialistes o banderes de la nuesa organización participamos dientru'l bloque soberanista de la manifestación y tamién espardimos cientos d'octavilles col titulu de "1u de Mayu: la mocedá sema socialismu". Espresamos polo tanto la nuesa posición nel día de les y los trabayadores y fiximos llegar el nuesu mensaxe pol socialismu, el futuru de la mocedá y la reconstrucción nacional d'Asturies.

La mocedá asturiano revolucionario entiende que ye'l momentu de lluchar pola soberanía del Pueblu Trabayador Asturianu o lo que ye lo mesmu, da-y poder a esti pueblu frenti les imposiciones xabaces del capital. La Unión Europea y el Reinu d'España son la conderga de la mocedá obrera pero ye momentu de dicir que yá valió d'especular ya hipotecar el nuesu futuru.

 
Pa finar llamamos a siguir afondando na unidá obrera y popular nesti país col envís de construyir una alternativa que plante-y cara a toles agresiones del capitalismu a los pueblos y los trabayadores. Camentamos necesariu que'l sindicalismu de clas siga tomando a Asturies como ámbetu de llucha pa ganar en soberanía y aparar la Troika. De la mesma manera la izquierda política que piensa en clave anticapitalista y patriota tien de tar al altor de les circunstancies y siguir afondando nel procesu d'unidá d'aición.

¡Puxa'l Primeru de Mayu! ¡Mocedá nun te rindas! ¡Llucha!
¡Por una Asturies socialista y dixebrá!