Darréu llama a participar na manifestación del Primeru de Mayu dientro'l Bloque Soberanista.

Baxo'l llema #LluchandoPolaSoberanía la izquierda soberanista asturiana va participar na manifestación sindical del Primeru de Mayu en Xixón cola fin de pidir “techu, tierra, trabayu, pan, salú, educación, independencia, llibertá, xusticia y paz". Dende la Mocedá d'Izquierda Soberanista camentamos que participar d'esta forma na manifestación ye la forma más responsable, unitaria y coherente de defender los drechos sociales y nacionales d'Asturies.

La propuesta vien frutu d'un trabayu d'alderique y consensu ente la izquierda soberanista y anque con dalgunes posibles contradicciones y cuestiones nes qu'afondar de forma crítica y autocrítica paez que ye la meyor forma de salir a la cai esti 1u de Mayu pa los patriotes d'izquierda. Poro, llamamos a la mocedá asturiano a participar nesti bloque y amosar que siguimos #LluchandoPolaSoberanía.

Dende Darréu queremos dexar nidio que'l capitalismu nin se reforma nin se puede aspirar a xestionar. El capitalismu hai que destruyilo n'Asturies y en tolos pueblos del mundu y cueslquier iniciativa que nun asuma esta cenciella base sigue siendo parte'l problema y nun tará en nengún momentu delláu de la clas obrera y los otros seutores populares. La mocedá asturiano nun tien otru camín p'aspirar a un futuru dignu que construyir pasu ente pasu socialismu y combatir l'imperialismu.

Nesti sen la Europa del capital y l'Estáu Español son dos enemigos irreconciliables pa los pueblos que busquen democracia, llibertá y soberanía pa desendolcase ensín les imposiciones y la opresión d'una oligarquía privilexada que paez d'otru sieglu. D'esta manera entendemos que lluchando pola soberanía d'esti país tamos faciendo tamién una fonda llabor por semar socialismu n'Asturies, puxando por otru mundu posible, onde les bayura seya de toes y toos y el rumbu de los pueblos tea en manes de los y les trabayadores.

¡Lluchando pola soberanía! ¡Semando Socialismu!