Charra-alderique: la doble cara del Mundial 2014, esti sábadu 28 n'Uviéu

La Mocedá d'Izquierda Soberanista entama esti sábadu 28 de xunu una actividá crítica coincidiendo col Mundial de Fúbol 2014 que se ta cellebrando en Brazil. Dende Darréu queremos ufrir a la mocedá una perspeutiva dura pero real de lo que ta pasando realmente en Brazil, que va más allá del fúbol negociu y el mercantilismu deportivu más estremu.

Esta actividá vamos desendolcala nel Llocal Cambalache d'Uviéu (C/Martínez Vigil, 30, baxu) de magar les 12:30 y el principal atractivu sedrá una charra-alderique col llema "la doble cara del Mundial 2014: realidá social y movimientos sociales en Brazil". La charra va tar protagonizada por Nacho González, compañeru de Soldepaz Pachakuti especializáu nel contestu brasileñu y les lluches que se tan dando n'America Llatiana. Solliñar amás que los compañeros de Soldepaz Pachakuti d'Asturies tuvieron nel Congresu que'l MST (Movimientu de los Trabayadores Rurales ensín Tierra) cellebró en febreru.

Con esta charra, na que de xuru habrá bien d'alderique, queremos que la mocedá seya consciente de los abusos que'l capital ta faciendo en Brazil cola collaboración de tolos gobiernos ya instituciones de los países imperialistes. Queremos averar a la mocedá asturiano'l contestu del país carioca y tolos movimientos sociales que lluchen anguaño por camudar la situación del mesmu y que traten de combatir tolos problemes que ta xenerando'l Mundial 2014. 

Poro, sedrá una actividá en clave formativa onde tendremos el placer de cuntar con una persona mui preparada p'averanos una visión crítica de tolo que ta pasando en Brazil. Sedrá una esperiencia mui bayurosa, pues saldrán de xuru munchos temes  estremaos y podremos tener la oportunidá de crear muncho alderique. Cuando acabe la primer actividá zarraremos la xornada con un pinchéu solidariu nel mesmu llocal. ¡Pasaivos que vamos deprender muncho! 

Nel Mundial 2014 ¡l'únicu rival ye'l capital!